२३औँ राष्ट्रिय धान दिवस तथा रोपाइँ महोत्सव भव्य रूपमा

महेश सिंह सिरहा लहान – सिरहाको भगवानपुर गाउँपालिकाको आयोजनामा २३औँ राष्ट्रिय धान दिवस तथा रोपाइँ महोत्सव–२०८३ भव्य रूपमा सम्पन्न भएको छ। कृषि उत्पादन वृद्धि, किसानलाई प्रोत्साहन तथा आधुनिक कृषि प्रविधिको प्रवर्द्धन गर्ने उद्देश्यले कार्यक्रम आयोजना गरिएको हो।

कार्यक्रम भगवानपुर गाउँपालिकाका अध्यक्ष उग्र नारायण यादवको अध्यक्षतामा सम्पन्न भएको थियो। कार्यक्रममा स्थानीय किसान, कृषि प्राविधिक, जनप्रतिनिधि तथा विभिन्न सरोकारवाला निकायका प्रतिनिधिहरूको उल्लेखनीय सहभागिता रहेको थियो।

राष्ट्रिय कृषक समूह महासंघ नेपालका मधेश प्रदेश सचिव यामुन प्रसाद यादवका अनुसार कार्यक्रमले धान उत्पादन वृद्धि, खाद्य सुरक्षा सुदृढीकरण तथा किसानलाई आधुनिक खेती प्रणालीतर्फ आकर्षित गर्न महत्वपूर्ण भूमिका खेलेको छ।

कार्यक्रममा सामूहिक धान रोपाइँ, कृषि प्रविधिबारे जानकारी आदान–प्रदान तथा किसानबीच अनुभव साटासाट गरिएको थियो। कृषि प्राविधिक उमेश नन्दन चौधरीले उल्लेखनीय संख्यामा किसानहरूको सहभागिताले कार्यक्रमलाई थप प्रभावकारी बनाएको जानकारी दिए।

केयर नेपालको सहयोग तथा राष्ट्रिय कृषक समूह महासंघ नेपालको समन्वयमा आयोजित उक्त महोत्सवमा धान उत्पादन वृद्धि, कृषि आधुनिकीकरण र किसानको सम्मानलाई विशेष प्राथमिकता दिइएको आयोजकले जनाएको छ।