सिरहामा कृषि र पोषण सचेतना बढाउन मेला आयोजना

महेश सिंह, सिरहा – सिरहाको सखुवानन्कारकट्टी गाउँपालिका–३, परियारपुर चोकमा कृषि तथा पोषण मेला प्रदर्शनी सम्पन्न भएको छ। स्थानीय किसान, महिला समूह तथा सरोकारवालाको सहभागितामा आयोजित मेलाले कृषि उत्पादन, पोषणयुक्त खानपान तथा कृषिमा आधारित उद्यमशीलताको प्रवर्द्धनमा महत्वपूर्ण योगदान पुर्‍याएको आयोजकले जनाएको छ।

मेलामा स्थानीय स्तरमा उत्पादन भएका तरकारी, फलफूल तथा अन्य कृषि उपजहरूको प्रदर्शनी गरिएको थियो। साथै पोषणसम्बन्धी सचेतना अभिवृद्धि गर्ने उद्देश्यले विभिन्न जानकारीमूलक सामग्री तथा अभ्यासहरू प्रस्तुत गरिएको थियो।

 कार्यक्रमअन्तर्गत आयोजित उक्त मेलामा किसानहरूलाई आधुनिक कृषि प्रविधि, पोषणमैत्री खेती प्रणाली तथा खाद्य सुरक्षासम्बन्धी जानकारी प्रदान गरिएको थियो। कार्यक्रममा सहभागीहरूले कृषि उत्पादनसँगै परिवारको पोषण सुधारका लागि यस्ता कार्यक्रम प्रभावकारी रहेको बताएका छन्।

कार्यक्रममा स्थानीय जनप्रतिनिधि, कृषक समूह, महिला सञ्जाल, विभिन्न संघसंस्था तथा समुदायका प्रतिनिधिहरूको उल्लेखनीय सहभागिता रहेको थियो। आयोजक संस्थाहरूले कृषि उत्पादन वृद्धि, पोषण सुधार तथा किसानको आयआर्जन बढाउन यस्ता कार्यक्रमलाई निरन्तरता दिने प्रतिबद्धता व्यक्त गरेका छन्।