महेश सिंह /रामसेवक राम लहान, लहान १ स्थित लायन्स क्लबको आयोजनामा र गोल्डेन फ्युचर एकेडेमीको सहकार्यमा र किडस मनटेश्वरीको समन्वयमा “लागु औषध नियन्त्रणमा युवाको भूमिका” विषयक मावि स्तरीय वक्तृत्वकला प्रतियोगिता भव्य रूपमा सम्पन्न भएको छ। कार्यक्रममा १७ वटा सरकारी तथा निजी विद्यालयका विद्यार्थीहरूको सक्रिय सहभागिता रहेको थियो।
प्रतियोगिताका प्रमुख अतिथि उधोग बाणिज्य संघ सिरहा लहानका अध्यक्ष बिकास सारडाले सहभागी विद्यार्थीहरूको ज्ञान, सीप र प्रभावशाली प्रस्तुति प्रशंसा गर्दै नियमित अभ्यासको महत्त्व औंल्याए। उनले सरकारी विद्यालयका बालबालिकाहरूको क्षमता वृद्धि गर्न पोषण, वातावरण र व्यवस्थापन सुधारमा ध्यान दिनुपर्ने आवश्यकता पनि उल्लेख गरे।
कार्यक्रममा नेशनल एकेडेमी लहानकी छात्रा एसिना प्रविनले प्रथम स्थान हासिल गरिन्। दोस्रो स्थान स्कुल अफ स्कलरकी विनी यादव र तेस्रो स्थान लोटस बोर्डिङ स्कुलकी निसा यादवले हात पारे। छात्रतर्फ प्रथम स्थान लक्ष्मण ललित कुशवाहा माध्यमिक विद्यालयका नेफुरुल अन्सारीले जिते। स्कुल अफ स्कलरका पुष्प कुशवाह दोस्रो र वेबी एन्जल सेकेन्डरी स्कुलका अविनाश यादव तेस्रो स्थानमा रहे।
कार्यक्रमका सभापति शंकर प्रसाद गुप्ताले सिरहा जिल्लामा यस्ता प्रतियोगिताहरूले युवामा सामाजिक चेतना फैलाउन मद्दत पुर्याउने बताए। उनले स्थानीय तह, वडा समिति र युवा सञ्जालले यस्ता गतिविधिहरूलाई प्रोत्साहन गर्नुपर्ने आवश्यकता औंल्याए। “समाजमा व्याप्त विकृतिहरू हटाउन कानुनको प्रभावकारी कार्यान्वयन गर्न जरुरी छ,” उनले भने।
प्रतियोगिताका निर्णायक शिक्षकहरू राम विलास यादव, मदन मण्डल र संजय यादवले निर्णायक भुमिका निर्वाह गरे। कार्यक्रमको सहजीकरण तथा व्यवस्थापनमा शिक्षा क्षेत्रमा उल्लेखनीय योगदान पुर्याउँदै आएका उपेन्द्र प्रसाद यादवको महत्त्वपूर्ण भूमिका रहेको थियो।
कार्यक्रमले विद्यार्थीहरूमा आत्मविश्वास, प्रतिस्पर्धात्मक भावना र सामाजिक सचेतना अभिवृद्धि गरेको लायन्स कलबका संस्थापक अध्यक्ष राकेश झाले जानकारी दिनु भयो ।
Discussion about this post