महेश सिंह, लहान सिरहा –सिरहाको लहान नगरपालिका–६ स्थित सियोनमा छाप्रोबासको चाडको अन्तिम दिन विभिन्न धार्मिक कार्यक्रमसहित मनाइएको छ।
विश्वभरका परमेश्वरका मण्डलीका विश्वासीहरूले मनाउँदै आएको उक्त चाडको अन्तिम दिन सियोनमा सामूहिक प्रार्थना, धार्मिक कार्यक्रम तथा सुसमाचार प्रचारलगायतका कार्यक्रम गरिएको सियोन लहानका प्रमुख हेमन्त रायले जानकारी दिनुभयो।
विश्वसमाचार समाजका अनुसार तीन चरणमा मनाइने सातवटा चाडमध्ये छाप्रोबासको चाड अन्तिम चाड हो। उक्त संस्थाले छाप्रोबासको चाडलाई अन्तिम झरी पवित्र आत्माको प्रतिज्ञासँग सम्बन्धित महत्वपूर्ण चाडका रूपमा व्याख्या गर्दै आएको छ।
धार्मिक मान्यताअनुसार छाप्रोबासको चाडको ऐतिहासिक सुरुआत पवित्र वासस्थान निर्माणसँग जोडिएको छ। इस्राएलीहरूले सुन, चाँदी, कपडा, काठलगायत सामग्री स्वेच्छाले अर्पण गरी पवित्र वासस्थान निर्माणमा सहभागी भएको घटनाको स्मरणमा छाप्रो बनाएर चाड मनाउने परम्परा विकास भएको बताइन्छ।
विश्वसमाचार समाजको व्याख्याअनुसार पुरानो करारका चाडहरूले येशू ख्रीष्टद्वारा पूरा हुने भविष्यवाणीलाई संकेत गर्छन्। छाप्रोबासको चाडको अन्तिम दिनलाई अन्तिम झरी पवित्र आत्मा प्राप्त गर्ने तथा विश्व सुसमाचारको कार्य पूरा हुने समयसँग सम्बन्धित रहेको विश्वास गरिन्छ।
जकरिया १४ अध्यायको १६ पदमा छाप्रोबासको चाडसँग सम्बन्धित प्रसङ्ग उल्लेख रहेको जनाउँदै संस्थाले उक्त प्रसङ्गमा पानीलाई पवित्र आत्माको वर्षाको प्रतीकका रूपमा व्याख्या गरेको छ। स्वर्गीय माता परमेश्वरमा विश्वास गर्दै प्रार्थना गरेमा अन्तिम झरी पवित्र आत्माको वरदान र शक्ति प्राप्त हुने धार्मिक विश्वास रहेको रायले बताउनुभयो।
चाडको अवसरमा सहभागी विश्वासीहरूले पवित्र आत्माको वरदान तथा फल प्राप्तिका लागि प्रार्थना गर्नुका साथै विश्वभर सुसमाचार फैलाउने कार्यमा समर्पित हुने प्रतिबद्धता व्यक्त गरेका थिए।
Discussion about this post