लक्ष्मीनियाँ पिर्बोनी स्थानीयलाई सहज र व्यवस्थित स्वास्थ्य सेवा उपलब्ध हुने विश्वास

महेश सिंह लहान सिरहा – लहान नगरपालिका–११ मा निर्माण सम्पन्न भएको लक्ष्मीनियाँ आधारभूत स्वास्थ्य सेवा केन्द्रको नवनिर्मित भवन उद्घाटन गरिएको छ। नगर प्रमुख महेश चौधरीले रिबन काटेर भवनको उद्घाटन गरेका हुन्।

वडा अध्यक्ष सूर्यनारायण चौधरीको अध्यक्षतामा आयोजित कार्यक्रममा नगर प्रमुख चौधरीले स्वास्थ्य सेवा केन्द्रको नवनिर्मित भवन उद्घाटन गरेका थिए। भवन निर्माणसँगै स्थानीय बासिन्दाले सहज, सुरक्षित र व्यवस्थित स्वास्थ्य सेवा पाउने अपेक्षा गरिएको छ।

उद्घाटन कार्यक्रममा बोल्दै नगर प्रमुख चौधरीले नगरपालिकाले नागरिकको आधारभूत स्वास्थ्य सेवामा पहुँच विस्तारलाई प्राथमिकतामा राखेको बताए। स्वास्थ्य संस्था भौतिक पूर्वाधारले सम्पन्न हुँदै गएसँगै स्थानीयस्तरमै गुणस्तरीय स्वास्थ्य सेवा उपलब्ध गराउन सहज हुने उनको भनाइ थियो।

कार्यक्रममा वडा तथा नगरपालिकाका जनप्रतिनिधि, कर्मचारी, स्वास्थ्यकर्मी, स्थानीय अगुवा तथा स्थानीय बासिन्दाको उपस्थिति थियो। सहभागीहरूले नवनिर्मित भवनले लक्ष्मीनियाँ क्षेत्रका नागरिकलाई स्वास्थ्य सेवा लिन थप सहज हुने विश्वास व्यक्त गरेका थिए।

नवनिर्मित भवन सञ्चालनमा आएसँगै स्थानीय नागरिकलाई आधारभूत स्वास्थ्य सेवा अझ व्यवस्थित र प्रभावकारी रूपमा उपलब्ध हुने अपेक्षा गरिएको छ।