महेश सिंह, लहान –सिरहाको सखुवानन्कारकट्टी गाउँपालिका–४ खैरबोनामा रहेको ग्राम ज्योति कृषि सहकारी संस्था लिमिटेडले किसानलाई सहज रूपमा मलखाद उपलब्ध गराउन थालेको छ। वडा नम्बर ४ का अध्यक्ष रमेश गोइत र सहकारीबीच केही महिनादेखि जारी विवाद अन्त्य भएपछि किसानलाई पालिकाले निर्धारण गरेको मूल्यमा मलखाद वितरण सुरु गरिएको हो।
सहकारीले मंगलबार आयोजना गरेको कार्यक्रममा गाउँपालिकाकी उपाध्यक्ष निलमदेवी यादव, कृषि शाखा प्रमुख हरिनारायण यादव र नेपाल पत्रकार महासंघ सिरहाका अध्यक्ष मनोज बनैताको रोहवरमा सयौँ किसानलाई मलखाद वितरण गरेको सहकारीका प्रमुख विजय झाले जानकारी दिए।
झाका अनुसार किसानलाई कृषि सामग्री सहज रूपमा उपलब्ध गराउने उद्देश्यले सहकारीले काम गर्दै आएको छ। उनले संस्थाले कालोबजारी नगरेको दाबी गर्दै किसानलाई आवश्यक मलखाद निर्धारित मूल्यमा उपलब्ध गराउने प्रतिबद्धता जनाए।
गाउँपालिका उपाध्यक्ष यादवले सहकारी र वडा अध्यक्षबीचको विवाद अन्त्य भएसँगै किसानले सहज रूपमा मलखाद पाउन थालेको बताइन्। किसानको हितलाई केन्द्रमा राखेर कृषि सामग्रीको वितरणलाई पारदर्शी र व्यवस्थित बनाउनुपर्ने उनको भनाइ थियो।
कार्यक्रममा नेपाल पत्रकार महासंघ सिरहाका अध्यक्ष बनैताले रासायनिक मलमा मात्रै निर्भर नभई किसानले आफ्नै घरमा कम्पोस्ट मल उत्पादन गरी प्रयोग गर्नुपर्नेमा जोड दिए। उनले स्थानीय स्रोतबाट उत्पादन हुने जैविक मलको प्रयोग बढाउन किसानलाई आग्रह गरे।
त्यस्तै, संस्थाका प्रतिनिधि जगन्नाथ झाले आगामी दिनमा विवादको अवस्था आउन नदिने प्रतिबद्धता व्यक्त गर्दै वास्तविक किसानको पहिचानका लागि ‘किसान कार्ड’ वितरणको व्यवस्था गर्नुपर्ने बताए। किसानको पहिचान स्पष्ट भएपछि मलखाद वितरणलाई थप व्यवस्थित र पारदर्शी बनाउन सहयोग पुग्ने उनको भनाइ थियो।
सहकारीले कृषि सामग्रीको वितरणमा पारदर्शिता कायम गर्दै किसानको मागअनुसार सेवा विस्तार गर्ने जनाएको छ। स्थानीय किसानलाई गाउँमै सहज रूपमा मलखाद तथा कृषि सामग्री उपलब्ध गराउने उद्देश्यले सहकारीले आफ्नो सेवा निरन्तर अघि बढाउने जनाएको छ।
Discussion about this post