महेश सिंह लहान सिरहा –सुनसरीको देवानगञ्जमा भएको घटनाको प्रभाव सिरहामा पनि परेको छ। घटनाप्रति ऐक्यबद्धता जनाउँदै निजी तथा आवासीय विद्यालय अर्गनाइजेशन नेपाल (प्याब्सन) सिरहामा आबद्ध अधिकांश निजी विद्यालय शुक्रबार बन्द गरिएका छन्।
यससँगै सिरहाका विभिन्न बजार क्षेत्रमा दिनभर व्यापार–व्यवसाय आंशिक रूपमा प्रभावित भएको छ। बजारका अधिकांश पसल बन्द रहँदा सर्वसाधारणको दैनिक जनजीवनमा समेत असर परेको देखिएको छ। यस्तै, छोटो तथा लामो दूरीका सार्वजनिक सवारीसाधन सञ्चालन हुन नसक्दा यात्रुहरू गन्तव्यमा पुग्न कठिनाइमा परेका छन्।
प्याब्सन सिरहाका अध्यक्ष उमेश चौधरीका अनुसार जिल्लाभर प्याब्सनमा आबद्ध विद्यालयहरू बन्द गरिएका हुन्। उनले सामाजिक सद्भाव, धार्मिक सहिष्णुता तथा राष्ट्रिय एकता कायम राख्न सबै पक्ष संयमित हुनुपर्ने आवश्यकता औंल्याउँदै शान्तिपूर्ण वातावरण निर्माणमा सहयोग गर्न आग्रह गरे।
यसअघि प्याब्सन केन्द्रीय कार्यसमितिले पनि विज्ञप्ति जारी गर्दै देवानगञ्ज घटनाप्रति दुःख व्यक्त गर्दै सामाजिक सद्भाव, धार्मिक सहिष्णुता र राष्ट्रिय एकता कायम राख्न सबैमा अपिल गरेको थियो। साथै, अफवाह र उत्तेजनात्मक अभिव्यक्तिबाट टाढा रही संवाद, सहिष्णुता र कानुनी प्रक्रियामार्फत समस्याको समाधान खोज्न सबै पक्षलाई आग्रह गरेको छ।
Discussion about this post