महेश सिंह सिरहा, साउन १२ — सुनसरीको देवानगञ्जमा हिन्दू समुदायमाथि दमन भएको भन्दै त्यसको विरोधमा विश्व हिन्दू परिषद् नेपाल, सिरहा जिल्ला कार्यसमितिका सदस्यहरूले मंगलबार सिरहाका प्रमुख जिल्ला अधिकारी सुरेन्द्र पौडेल मार्फत नेपाल सरकारको ध्यानाकर्षण गराउँदै ज्ञापनपत्र बुझाएका छन्।
ज्ञापनपत्रमा देवानगञ्ज घटनाको निष्पक्ष छानबिन गर्न, दोषीमाथि कानुनबमोजिम कारबाही गर्न तथा धार्मिक स्वतन्त्रता र नागरिकको संवैधानिक अधिकारको सुनिश्चितता गर्न सरकारसँग माग गरिएको छ।
विश्व हिन्दू परिषद् नेपाल, सिरहा जिल्ला अध्यक्ष शिव देव साहले सुनसरीको देवानगञ्जमा भएको घटनाले हिन्दू समुदायमा गम्भीर चिन्ता र असन्तुष्टि उत्पन्न गरेको बताउँदै घटनाको सत्यतथ्य छानबिन गरी दोषीलाई कानुनी दायरामा ल्याउनुपर्ने माग गर्नुभयो।
उहाँले धार्मिक सहिष्णुता, सामाजिक सद्भाव र कानुनी शासन कायम राख्न सरकार संवेदनशील हुनुपर्ने उल्लेख गर्दै यस्ता घटनाको पुनरावृत्ति हुन नदिन प्रभावकारी कदम चाल्न आग्रह गर्नुभयो।
ज्ञापनपत्र बुझ्दै प्रमुख जिल्ला अधिकारी सुरेन्द्र पौडेलले प्राप्त ज्ञापनपत्र सम्बन्धित निकायसम्म पठाइने र आवश्यक प्रक्रिया अघि बढाइने बताउनुभएको परिषद्का अध्यक्ष साहले जानकारी दिनुभयो।
Discussion about this post