दुई प्रहरीसहित तीन जना पुर्पक्षका लागि कारागार, होटल सञ्चालक धरौटीमा छुटे
महेश सिंह सिरहा लहान –धनुषामा १६ वर्षीया बालिकालाई अपहरण गरी होटलमा बन्धक बनाएर करिब तीन सातासम्म बलात्कार गरेको घटनामा दुई प्रहरी जवानसहित तीन जना पुर्पक्षका लागि कारागार चलान भएका छन्। होटल सञ्चालक भने धरौटीमा छुटेका छन्।
जिल्ला अदालत धनुषाका न्यायाधीश ईश्वर आचार्यको इजलासले प्रहरी जवान बरुणकुमार साह र नितेशकुमार महतो तथा होटल मधेश प्रदेश गेस्ट हाउसका कर्मचारी धीरजकुमार दासलाई थुनामा पठाउने आदेश दिएको हो। होटल सञ्चालक मोलवी उर्फ अजिज राइन भने चार लाख धरौटीमा छुटेका जिल्ला सरकारी वकिल कार्यालयले जनाएको छ।
जाहेरीअनुसार पीडितलाई अपहरणपछि जनकपुरको होटल सीएफसीमा दुई दिन र त्यसपछि मधेश प्रदेश गेस्ट हाउसमा १७ दिनसम्म बन्धक बनाई पटक–पटक बलात्कार गरिएको थियो। पीडितले प्रहरी ड्रेसमै आएर समेत धम्की दिँदै बलात्कार गरेको बयान दिएकी छन्।
यसअघि चैत महिनामै पीडितले मुख्य आरोपी ताहिर राइनविरुद्ध अपहरण र बलात्कारको जाहेरी दिएकी थिइन्। तर प्रहरी प्रशासनले तत्काल दर्ता नगरेपछि उनी विदेश भागेका हुन्। प्रहरीको ढिलासुस्तीका कारण घटनाले भयावह रूप लिएको सरकारी वकिल कार्यालयका प्रमुख अधिवक्ता विदुर कार्कीले बताए।
मानव अधिकारकर्मीका अनुसार घटनापछि पीडित परिवारलाई प्रहरीकै दबाबमा २० लाख रुपैयाँमा मिलापत्र गर्न दवाव दिइएको थियो। तर पीडितले पैसा नभई न्याय खोजेपछि मात्रै मुद्दा अघि बढेको हो। धनुषामा प्रहरी नै संलग्न भएको यस घटनाले राज्य संयन्त्रप्रतिको विश्वासमा गम्भीर प्रश्न उठाएको छ।
Discussion about this post