उपेन्द्र यादवमाथि लगाइएको गौर हत्या मुद्दा झुठो भन्दै जसपाको विरोध प्रदर्शन

महेश सिंह,सिरहा –जनता समाजवादी पार्टी (जसपा) नेपालका केन्द्रिय अध्यक्ष उपेन्द्र यादवमाथि लगाइएको गौर हत्या कान्ड सम्बन्धी मुद्दा झुठो भएको भन्दै जसपा समर्थकहरुले सिरहासहितका विभिन्न स्थानमा विरोध प्रदर्शन गरेका छन्।
सिरहाको नरहा गाउँपालिकाको नरहा चौकमा आयोजित मसाल जुलुसलाई प्रदेशसभा सदस्य संजिला यादव, जसपाका केन्द्रिय सदस्य त्रिपुरा झा, युवा नेता विजयकुमार यादवलगायतले नेतृत्व गरेका थिए। प्रदर्शनमा सयौं कार्यकर्ताहरुको सहभागिता थियो।
विरोधसभालाई सम्बोधन गर्दै नेताहरुले उपेन्द्र यादवमाथि लगाइएको मुद्दा राजनीतिक पूर्वाग्रहका आधारमा दर्ता भएको दाबी गर्दै तत्काल खारेजीको माग गरे। उनीहरुले चेतावनी दिंदै भने, “मुद्दा खारेज नभए देशभर मधेस आन्दोलन दोहोरिनेछ र आन्दोलनको जिम्मेवारी सरकारको हुनेछ।”
यसैगरी लहान, गोलबजार, मिर्चैया, सखुवानान्कारकट्टी र बरियारपट्टीलगायतका ठाउँमा पनि पार्टी कार्यकर्ताले नाराबाजीसहित प्रदर्शन गरेका छन्। जसपाले यसलाई मधेसको अस्तित्व र पहिचानमाथिको राजनीतिक प्रहार भएको भन्दै आन्दोलनलाई अझ तीव्र बनाउन तयारी थालेको जनाएको छ।