घरभाडा नतिरी भाग्यो चिनियाँ कम्पनी

काठमाडाैँ । चिनियाँ कम्पनी ओप्पो मोबाइल कम्पनीको नेशनल डिस्ट्रिब्युटर घरभाडा नतिरीकन भागेको छ । चिनियाँ कम्पनीले घरभाडा नतिरीकन भागेको भन्दै घरधनीले कानुनी प्रकिया सुरु गर्ने तयारी गरेका छन् ।

ओप्पो मोबाइल कम्पनीको नेशनल डिस्ट्रिब्युटर साविक ओप्पो डि.एस. प्रा.लि., हाल डि.एस. प्रा.लि.ले तीन महिनादेखि घरभाडा नतिरी घर खाली गरेर सम्पर्कविहीन भएको घरधनी संगीता बस्न्यातले बताइन्।

घरबहाल सम्वन्धी करारनामामा उक्त कम्पनीले काठमाडौं महानगरपालिका-५, हॉडिगाउंमा बस्न्यातको नाममा रहेको एक रोपनी जग्गा र सो जग्गामा बनेको २ वटा घर तथा टहरा समेत विगत ६ वर्ष देखि लिजमा लिई भोगचलन गर्दै आएको थियो। २०७९ बैशाख १ गतेदेखि दुई वर्षको लागि करारनामा नविकरण भएको थियो ।

उक्त कम्पनीले विगत तीनमहिनादेखिको भाडा नतिरीकन, घर छाड्ने अग्रिम सूचना नदिइकन र घरको अवस्था बिगारेर फरार भएको भन्दै बस्न्यातले सात दिनभित्र सम्पूर्ण दायित्वहरू पुरा गर्न उक्त कम्पनीलाई लेखेकी छन्।

यस विषयमा ओप्पो डि.एस. प्रा.लि. आधिकारिक व्यक्तिहरूसँग सम्पर्क स्थापित हुन सकिरहेको छैन । कम्पनी रजिष्टार कार्यालयका उप-सचिव शेखर बाबु कार्कीका अनुसार उक्त कम्पनीका अध्यक्ष चिनिया नागरिक “YOU BAO ZHAO” हुन् ।

५ वर्षसम्म नियमित भाडा दिएर बसेको कम्पनी गत असारदेखि भाडा नदिइ घरबाट भागेको घरधनी संगीता बस्नेतले जानकारी दिइन् ।

‘कम्पनीले गत जेठमा घर खालि गर्न लागेको भन्दै इमेल गरेको थियो । हामीले सम्झौताको शर्तअनुसार ३ महिनाको अग्रिम जानकारी दिन र घर मर्मत गर्न भनेका थियौं,’ बस्नेतले भनिन्, ‘तर, उनीहरुले हामीलाई थप केही जानकारी दिएनन् । दुई साता अगाडि छिमेकीले ढोका खुल्ला रहेको जानकारी दिएपछि ओप्पोले घर छोडेको थाहा पाएका थियौं ।’

सम्झौतामा घर छोड्नुभन्दा ३ महिना अगाडि जानकारी गराउनु पर्ने र घर छोड्दा चाबी हस्तान्तरण गर्नु पर्ने उल्लेख भए पनि सम्झौता अवधि बाँकी छँदै बिनाजानकारी घर छोडेको घर धनीको आरोप छ ।

‘हामीले ओप्पोको नेपाल प्रमुख रहेका चिनियाँ नागरिक ली जेङलाई घर भाडा तिर्न आग्रह गरेका थियौं,’ बस्नेतले भनिन्, ‘उल्टै लि जेङले हामीलाई धम्की दिए । उनले भने, म घर भाडा तिर्दिन्, तिमिहरु जे सक्छौं त्यही गर ।’

उसले आफैं जे सक्छौं गर भनिसकेपछि कानूनी उपचारका लागि जिल्ला अदालत काठमाडौंमा मुद्दा दायर गर्न लागेको बस्नेतलले जानकारी दिइन् ।

‘उसले ६ लाख ३३ हजार घरभाडा तिर्नु पर्नेछ, यस्तै घर मर्मत गर्न १०/१२ लाख रुपैयाँ लाग्ने प्राविधिकले जानकारी दिएका छन्,’ बस्नेलले भनिन्,‘२०/२२ लाख रुपैयाँ धेरै ठूलो होइन । तर, नेपालमा आएर नेपाली नागरिकलाई धम्की दिने, न्यायाधीशलाई खरिद गरेर मुद्दा जित्छु भन्ने गतिविधि गरेपछि हामी बाध्य भएर अदालत जान लागेका हौँ ।’

आफूले करारका कुनै पनि शर्त उल्लंघन नगरेकाले अदालतबाट न्याय पाउने बस्नेतको विश्वास छ । घरबहाल सम्झौता पत्रमा २०८० चैत्रसम्म बहाल नविकरण गरिएको उल्लेख छ ।