सिरहामा सखिया मन्दिर उद्घाटन

महेश सिंह लहान सिरहा- सखुवानन्कारकट्टी गाउँपालिका–४, खङटोलमा निर्माण गरिएको सखिया मन्दिरको उद्घाटन गरिएको छ। वडाध्यक्ष रमेश कुमार यादव र दलित महिला सदस्य ककुलती देवी मण्डलले संयुक्त रूपमा मन्दिरको उद्घाटन गरेका हुन्।
खङ समुदायको कुल देवता मानिने सखियाको मन्दिर वडाको बजेट सिलिङबाट निर्माण गरिएको हो। समुदायका मागअनुसार धर्म र संस्कृति संरक्षण गर्ने उद्देश्यले तीन वर्षअघि वडाध्यक्ष यादवले मन्दिर निर्माणको प्रतिबद्धता जनाएका थिए।

“आज त्यो प्रतिबद्धता पूरा भएको छ,” उद्घाटन कार्यक्रममा वडाध्यक्ष यादवले भने, “धार्मिक पहिचान बचाउन यो मन्दिर महत्वपूर्ण हुनेछ।”
स्थानीयवासीका अनुसार धार्मिक आस्थाको केन्द्रका रूपमा रहने यो मन्दिरले खङ समुदायको पहिचानलाई जगेर्ना गर्ने विश्वास गरिएको छ। मन्दिर उद्घाटनसँगै क्षेत्रका बासिन्दाले धार्मिक तथा सांस्कृतिक गतिविधि संचालन गर्न सहज हुने बताएका छन्।
खङ समुदायका अगुवाहरूले धर्म, संस्कृति र परम्परालाई जीवित राख्न स्थानीय तहले चालेको यो कदम सराहनीय रहेको बताएका छन्। मन्दिर परिसरमा विशेष पूजाअर्चना गरिएको थियो भने उद्घाटन समारोहमा स्थानीय नेता, समाजसेवी र श्रद्धालुहरूको उल्लेख्य उपस्थिति रहेको थियो।