महेश सिंह लहान, सिरहा – राजनीतिक स्थायित्व र जनताको अपेक्षालाई पूरा गर्न नेपाली कांग्रेस र नेकपा एमालेको सहकार्यमा नयाँ सरकार गठन भएको छ। सरकार गठनको उद्देश्य स्थायित्व कायम गर्दै लोकतान्त्रिक अधिकारको रक्षा र आर्थिक विकासलाई गति दिनु रहेको उपप्रधानमन्त्री तथा शहरी विकासमन्त्री गणेशमान सिंहले बताएका छन्।
मन्त्री सिंहले लहानमा आयोजित कार्यक्रममा “कृषिलाई प्राथमिकता दिएर किसानको जीवनस्तर उकास्नुपर्छ,” भन्दै योजनाबद्ध विकासको खाँचो औंल्याए। “स्थान पहिचान गरी दीर्घकालीन विकास निर्माणमा लाग्नुपर्छ,” उनले थपे।
लहान नगरपालिकाको १५ औं नगर सभा नगर प्रमुख महेशप्रसाद चौधरीको अध्यक्षतामा सम्पन्न भएको छ। सभामा नगर उपप्रमुख राम चलितर महतो, कांग्रेस जिल्ला सभापति रामचन्द्र यादव, प्रमुख जिल्ला अधिकारी बासुदेव दहाल, जिल्ला प्रहरी प्रमुख रमेश पण्डितलगायतका अतिथिहरूको उपस्थिति थियो।
कार्यक्रममा नगर प्रमुख चौधरीले पछिल्लो समय सम्पन्न भएका कार्यहरूको विवरण प्रस्तुत गरे। प्रमुख अतिथि मन्त्री सिंहले लहानलाई देशकै ठूलो नगरपालिका भन्दै यस क्षेत्रको विकासका लागि थप प्रभावकारी योजना बनाउने प्रतिबद्धता जनाए।
नगरप्रमुख चौधरीले सभामा जनप्रतिनिधि र कर्मचारीहरूसँग समन्वय गरी आगामी योजनाहरूलाई गति दिनुपर्नेमा जोड दिए। कार्यक्रममा नगरपालिकाका २४ वडाका अध्यक्ष र प्रतिनिधिहरूको उपस्थिति रहेको थियो।
सहकार्य र स्थायित्वमार्फत विकास निर्माणका लक्ष्य हासिल गर्ने प्रतिबद्धतासहित अधिवेशन सम्पन्न भएको छ।
Discussion about this post