देशभक्त मोर्चा: सिपी मैनाली नेतृत्वमा २१ बुँदे अभियान सुरु

महेश सिंह लहान – नेपाल कम्युनिष्ट पार्टी (माले) का केन्द्रीय अध्यक्ष सिपी मैनालीले देशको समग्र राजनीतिक, आर्थिक र सामाजिक समस्यालाई समाधान गर्न देशभक्त मोर्चा गठन गर्ने घोषणा गरेका छन्। देशको विगत, वर्तमान र भविष्यप्रति चिन्ता व्यक्त गर्दै उनले जनतामुखी आन्दोलनमार्फत परिवर्तन ल्याउनुपर्ने आवश्यकता औंल्याए।
शनिबार आयोजित कार्यक्रममा मैनालीले भने, “लोकतन्त्र जनताको शक्ति हो। तर आजको प्रजातन्त्र पूँजीपतिको प्रजातन्त्र बनिसकेको छ। अब देशभक्त मोर्चा बनाएर अगाडि बढ्नैपर्छ।”
उनले २०६३ सालको त्रीपक्षीय सहमतिको मर्मअनुसार उन्नत समावेशी लोकतन्त्रको निर्माण, विदेशको हस्तक्षेपको विरोध र धर्म-मैत्री राज्यको परिकल्पना गर्नुपर्ने बताए। साथै, वर्तमान प्रदेश संरचनालाई खारेज गरी संघ, जिल्ला र पालिका तहसम्मको संघीयता कायम गर्नुपर्ने उनको माग थियो।
विदेशी हस्तक्षेपको प्रतिवाद गर्दै राष्ट्रिय स्वाभिमान जोगाउन र धर्मनिरपेक्षताको खारेज सनातनी सभ्यता र संस्कृतिको जगेर्ना गर्दै धर्म-मैत्री राज्यको स्थापना गर्न,संघीयता पुनर्संरचना वर्तमान प्रदेश संरचनालाई खारेज गरी संघीयतालाई आधारभूत तहसम्म सीमित गर्नुपर्ने र समाजवादी मिश्रित अर्थतन्त्र राष्ट्रिय र साना पूँजीलाई समेटेर सामाजिक न्यायसहितको अर्थतन्त्र निर्माण गरी,साना संसद र सानो सरकार सानो र कुशल शासन प्रणालीको परिकल्पना गर्न अभियानमा सबै नेपाली देशभक्तहरुलाई लागिन्नु पर्ने बताए।
कार्यक्रममा पार्टीका केन्द्रीय सचिव रामचन्द्र गुप्ताले २१ बुँदे मागसहित देशव्यापी अभियान सुरु गरिने बताए। उनले भने, “यो अभियान देशलाई बचाउन र जनतालाई सशक्त बनाउनका लागि हो। सबै देशभक्त शक्तिलाई एकजुट हुन आह्वान गर्दछौं।”
मैनालीले परराष्ट्र नीतिमा पञ्चशीलका सिद्धान्त, संयुक्त राष्ट्रसंघको वडापत्र र एक-चीन नीतिलाई प्राथमिकता दिनुपर्ने बताए। उनले नेपाललाई शान्तिक्षेत्र घोषणा गर्ने र नागरिकता नीतिलाई कडाइ गर्नुपर्ने धारणा व्यक्त गरे।
उनले गरिबी, महँगी, भ्रष्टाचार, कुशासनलगायत ज्वलन्त समस्याविरुद्ध जनसंघर्ष गर्ने प्रतिबद्धता जनाए। साथै, विकृतिका रूपमा परिभाषित हुने समलिङ्गी विवाहको विरोध गर्दै तेस्रो लिङ्गीहरूको सम्मान सुनिश्चित गर्नुपर्ने बताए।
“हामी सबै नेपालीको नेपाल हो,” मैनालीले भने, “हामीबीचको विभेद र असमानता हटाउँदै राष्ट्रको समग्र विकासमा अघि बढ्नैपर्छ।”
यो अभियानले नेपाललाई नयाँ राजनीतिक दिशा दिने विश्वास व्यक्त गर्दै मैनाली नेतृत्वको मोर्चाले देशव्यापी गतिविधि तिव्र बनाइसकेको छ।