सिरहाको बिष्णुपुर गाउँपालिकामा विकासको सट्टा विनाशको दृश्य देखिन थालेको छ। यहाँको प्रमुख आयस्रोत पोखरी रहेको छ, जसलाई पूर्व गाउँपालिका अध्यक्षले लाखौं रुपैयाँ खर्च गरेर निर्माण गरेका थिए। कुनै समय यही पोखरीको ठेक्का न्यूनतम लागतमा लगाएको विरोधमा सडक आन्दोलन समेत भएको थियो। तर आज त्यही करोडौं आम्दानी दिने भनिएको पोखरी बेवारिसे अवस्थामा पुगेको छ।
पालिकाका जनप्रतिनिधि र कर्मचारीहरूमा अनियमितता र भ्रष्टाचार यति धेरै छ कि पोखरी सफा गर्न साधन मात्र होइन, इच्छाशक्ति समेत अभाव देखिन्छ। यद्यपि, उनीहरू समाजमा गर्वका साथ हिँडिरहेका छन्, न कुनै जिम्मेवारीको अनुभूति छ, न लाज। स्रोतका अनुसार, पोखरी विवादकै कारण तीन वर्षदेखि ठेक्का प्रक्रिया अगाडि बढ्न नसकेको हो। व्यक्तिगत स्वार्थका कारण लाखौं राजस्व गुमिरहेको छ।
पालिकामा सेनिटरी प्याड, फर्निचर, गाडी मर्मत, खानपिन जस्ता कुरामा अत्यधिक खर्च गरेर भ्रष्टाचारको प्रमाण देखिन्छ। सरकारी साधनस्रोतको दुरुपयोग व्यापक छ; व्यक्तिगत काममा पनि सरकारी साधन प्रयोग गरिन्छ। छोरीलाई रासन पुर्याउन जाँदा समेत सरकारी गाडीको तेल प्रयोग भएको कुरा उठ्दै आएको छ।
गाउँपालिकाको आफ्नै भवन, कृषि, पशु तथा बिष्णु सेवा केन्द्र हुँदाहुँदै पनि, कमिसनको खेलमा करोडौं रुपैयाँ खर्च गरेर भाडामा कार्यालय सञ्चालन गरिएको छ। पालिकाका धेरै विभाग प्रमुखविहीन छन् भने, पढेलेखेका युवाहरू बेरोजगार छन्। कृषि, भेटनरी जस्ता विभागमा कर्मचारीको अभाव छ। यहाँ बारम्बार प्रशासनिक अधिकृतको परिवर्तनले विकास कार्यमा बाधा पुर्याएको छ। पछिल्ला केही महिनादेखि निमित्त अधिकृतबाटै काम सञ्चालन हुँदै आएको छ।
पालिकाको नेतृत्वले जनप्रतिनिधिहरूसँग समन्वय गरी पारदर्शी निर्णय लिन नसक्दा विकासमा ठुलो गतिरोध आएको छ। यसले युवामा निराशा पैदा गरेको छ र गाउँपालिकाको वास्तविक विकासप्रति उनीहरू चिन्तित छन्।
Discussion about this post