महेश सिंह लहान – “बालापनको रक्षा: भविष्यको सुरक्षा” भन्ने मूल नाराका साथ सिरहाको लहान–२, मिलन चौकस्थित गोल्डेन फ्युचर एजुकेशनल एकेडेमीमा ६२ औँ राष्ट्रिय बाल दिवस २०८३ विविध रचनात्मक तथा अतिरिक्त क्रियाकलापका साथ सम्पन्न भएको छ।
कार्यक्रममा विद्यालयका करिब १०० जना विद्यार्थीहरूको उत्साहजनक सहभागिता रहेको थियो। दिवसका अवसरमा आयोजना गरिएका विभिन्न प्रतियोगिता तथा सांस्कृतिक प्रस्तुतिमा विद्यार्थीहरूले निकै हर्षोल्लासका साथ भाग लिएका थिए। बालबालिकाहरूले गीत-संगीतको तालमा झुमेर मनोरञ्जन लिनुका साथै आफ्ना प्रतिभाहरू प्रस्तुत गरेका थिए।
कार्यक्रमका क्रममा बालबालिकाहरूले आफ्ना अधिकारहरूलाई सुनिश्चित गर्न र समाजमा बाल अधिकारबारे सचेतना फैलाउन सबै पक्ष गम्भीर भएर लाग्नुपर्ने विचार व्यक्त गरेका थिए।
विद्यालयका संस्थापक प्रिन्सिपल उपेन्द्र यादवका अनुसार बालबालिकाको सर्वाङ्गीण विकास, क्षमता अभिवृद्धि र अधिकारको संरक्षणका लागि यस्ता रचनात्मक कार्यक्रमहरू आयोजना गरिएको हो।
दिवसका अवसरमा वक्तृत्वकला, नृत्य प्रतियोगिता, बोरा रेस, साइकल रेस, चम्चा रेस तथा जेरी रेस जस्ता प्रतिस्पर्धा सञ्चालन गरिएका थिए। प्रतियोगिताका उत्कृष्ट सहभागीहरूलाई कार्यक्रमका बीच पुरस्कार तथा प्रमाणपत्र वितरण गरिएको आयोजकले जनाएको छ।
Discussion about this post