महेश सिंह लहान सिरहा -सिरहाको धनगढीमाई नगरपालिका–१३ का समाजसेवी विष्णु न्यौपानेले व्यक्तिगत स्वार्थभन्दा सार्वजनिक हितलाई प्राथमिकता दिँदै वडा कार्यालय भवन निर्माणका लागि करिब तीन कठ्ठा निजी जग्गा नेपाल सरकारको नाममा निःशुल्क दान गरेका छन्। स्थानीय तहको भौतिक पूर्वाधार विकासमा उनको यो योगदानलाई धनगढीमाई–१३ का बासिन्दाले उदाहरणीय सामाजिक कार्यका रूपमा लिएका छन्।
वडा अध्यक्ष सूर्यमान तामाङका अनुसार कोरोना चोकस्थित करोडौं रुपैयाँ मूल्य पर्ने उक्त जग्गा वडा कार्यालय निर्माणका लागि दान गरिएको हो। उनका अनुसार जग्गा अभावका कारण कार्यालय भवन निर्माणमा देखिएको समस्या न्यौपानेको सहयोगपछि समाधान हुने अपेक्षा गरिएको छ।
विष्णु न्यौपाने सामाजिक तथा धार्मिक गतिविधिमा पनि उत्तिकै सक्रिय छन्। उनले आफ्नै नेतृत्वमा स्थानीयवासीबाट चन्दा संकलन गरी करिब ५० लाख रुपैयाँको लागतमा कोरोना चोकमा आकर्षक तथा नमूना शिव महादेव मन्दिर निर्माण गराएका छन्। मन्दिर निर्माणले धार्मिक आस्थाको केन्द्र मात्र नभई स्थानीय क्षेत्रको सौन्दर्य बढाउन पनि महत्वपूर्ण भूमिका खेलेको छ।
न्यौपानेका अनुसार मन्दिर निर्माणको उद्देश्य युवापुस्तालाई धर्म, संस्कृति र नैतिक मूल्यसँग जोड्दै सामाजिक सद्भावलाई थप मजबुत बनाउनु हो। पछिल्लो समय मन्दिर धार्मिक गतिविधि, पूजाआजा तथा सामुदायिक कार्यक्रम सञ्चालन हुने साझा केन्द्रका रूपमा विकसित हुँदै गएको स्थानीयको भनाइ छ।
स्थानीय समाजमा शिक्षा, धर्म, विकास र सामाजिक एकताको पक्षमा निरन्तर सक्रिय रहँदै आएका न्यौपानेले सार्वजनिक हितका लागि निजी सम्पत्ति दान गर्ने निर्णयले समाजमा सकारात्मक सन्देश दिएको स्थानीय बुद्धिजीवीहरूको भनाइ छ।
वडा अध्यक्ष तामाङले यस्ता समाजसेवीको योगदानले विकास निर्माणका कामलाई गति दिने मात्र नभई समाजमा सेवाभाव र उत्तरदायित्वको संस्कार स्थापित गर्न समेत प्रेरणा मिल्ने बताए। स्थानीयवासीले विष्णु न्यौपानेको योगदानलाई धनगढीमाई–१३ को विकास इतिहासमा सम्झनलायक कार्यका रूपमा व्याख्या गरेका छन्।
Discussion about this post