बालविवाह न्यूनीकरणका लागि शिक्षामा लगानी, ३३ किशोरीलाई शैक्षिक सामग्री

महेश सिंह लहान सिरहा- बालविवाह तथा विद्यालय छोड्ने जोखिममा रहेका किशोरीलाई शिक्षाको मूलधारमै टिकाइराख्ने उद्देश्यसहित मुक्ति नेपालले सिरहाको गोलबजार नगरपालिका–३ स्थित श्री सरस्वती माध्यमिक विद्यालय, जमदह तेतरियामा ३३ जना किशोरीलाई शैक्षिक सामग्री वितरण गरेको छ।

कार्यक्रमअन्तर्गत आर्थिक तथा सामाजिक रूपमा जोखिममा रहेका किशोरीलाई विद्यालय झोला, कापी, ज्यामिती बक्स, डटपेन र क्याल्कुलेटर उपलब्ध गराइएको हो। सहभागीहरूले यस्तो सहयोगले किशोरीहरूको पढाइ निरन्तर राख्न प्रेरणा मिल्ने विश्वास व्यक्त गरेका छन्।

विद्यालय व्यवस्थापन समितिका अध्यक्ष अयोधी सदायको अध्यक्षता तथा वडा नं. ३ का वडा अध्यक्ष धनप्रसाद लामाको प्रमुख आतिथ्यमा सम्पन्न कार्यक्रममा विद्यालयका प्रधानाध्यापक अरुण कुमार साह, शिक्षक–अभिभावक संघका अध्यक्ष रिझन साह, मुक्ति नेपालकी कार्यकारी निर्देशक श्याम कुमारी साह, जिल्ला संयोजक बिशेश्वर दास, परियोजना संयोजक त्रिवेणी कुमार यादव, शिक्षक, अभिभावक तथा विद्यालय व्यवस्थापन समितिका सदस्यहरूको उपस्थिति रहेको थियो।

कार्यक्रममा वक्ताहरूले बालविवाह, लैङ्गिक विभेद र विद्यालय छोड्ने प्रवृत्तिलाई न्यूनीकरण गर्न केवल शैक्षिक सामग्री वितरण मात्र पर्याप्त नहुने उल्लेख गर्दै परिवार, विद्यालय, स्थानीय सरकार र सामाजिक संस्थाबीच निरन्तर सहकार्य आवश्यक रहेको बताए। उनीहरूले सामाजिक सञ्जालको दुरुपयोगबाट किशोरीलाई जोगाउन अभिभावकीय निगरानी र गुणस्तरीय शिक्षाको भूमिका अझ महत्वपूर्ण रहेको धारणा राखे।

मुक्ति नेपालकी कार्यकारी निर्देशक श्याम कुमारी साहले छोरीहरूको शिक्षा नै हिंसा, विभेद र परनिर्भरताबाट मुक्त समाज निर्माणको आधार भएको बताउँदै उनीहरूको शिक्षामा परिवार र समुदायले प्राथमिकता दिनुपर्ने बताइन्। वडा अध्यक्ष धनप्रसाद लामाले शिक्षाबाट वञ्चित हुने जोखिममा रहेका बालबालिकाको पहिचान गरी वडा कार्यालयबाट आवश्यक सहयोग र समन्वयलाई निरन्तरता दिने प्रतिबद्धता व्यक्त गरे।

परियोजना संयोजक त्रिवेणी कुमार यादवका अनुसार आगामी चरणमा गोलबजार नगरपालिका वडा नं. १० र १३ का जोखिममा रहेका किशोरीलाई पनि यस्तै शैक्षिक सामग्री वितरण गरिनेछ।

कार्यक्रमको अन्त्यमा सामग्री प्राप्त गरेका किशोरीहरूले नियमित विद्यालय जाने, मन लगाएर अध्ययन गर्ने र पढाइलाई निरन्तरता दिने प्रतिबद्धता व्यक्त गरे। अभिभावकहरूले पनि छोरीहरूको शिक्षालाई प्राथमिकतामा राख्ने, बालविवाह नगर्ने र नगराउन सहयोग गर्ने सामूहिक प्रतिबद्धता जनाएका थिए।