कर परीक्षणको नाममा ५ लाख घुस मागेको आरोपमा लहानका कर अधिकृत रंगे हात अख्तियारको फन्दामा

महेश सिंह सिरहा लहान –  कर परीक्षणको प्रक्रियालाई प्रभावमा पारेर आर्थिक लेनदेन गर्न खोजिएको आरोपमा आन्तरिक राजस्व कार्यालय लहानका कर अधिकृत युवराज पाल अख्तियार दुरुपयोग अनुसन्धान आयोगको नियन्त्रणमा परेका छन्। आयोगको बर्दिबास कार्यालयबाट खटिएको टोलीले उनलाई ५ लाख रुपैयाँ घुस लिइरहेको अवस्थामा कार्यालय परिसरबाटै रंगेहात पक्राउ गरेको हो।

अनुसन्धानमा संलग्न स्रोतका अनुसार सिरहा सुपर मार्केट प्रालिको आर्थिक वर्ष २०७८/७९ को पूर्ण कर परीक्षण (फुल अडिट) का क्रममा कर अधिकृत पालले अडिट प्रक्रिया सहज बनाउन रकम मागेका थिए। उनले आफू एक्लैले नभई माथिल्लो तहका कर्मचारीलाई समेत मिलाउनुपर्ने भन्दै सुरुदेखि नै आर्थिक सौदाबाजी गरेको आरोप लागेको छ।

प्रारम्भिक परीक्षणपछि कम्पनीलाई कर, जरिवाना तथा अन्य शीर्षकमा करिब २ करोड रुपैयाँसम्म दायित्व पर्ने जानकारी दिइएको थियो। थप कागजात पेस भएपछि दायित्व अझै बढ्न सक्ने बताइएपछि त्यसलाई ‘व्यवस्थापन’ गरिदिने भन्दै १२ लाख रुपैयाँ मागिएको र अन्ततः ५ लाख रुपैयाँमा सहमति जुटाउने प्रयास भएको स्रोतको दाबी छ।

घुस लेनदेनको योजनाबारे जानकारी पाएपछि अख्तियारले निगरानी बढाएको थियो। पटक–पटक भेटघाटको समय र स्थान परिवर्तन गरिए पनि अन्ततः रकम कार्यालयमै ल्याउन भनिएपछि अख्तियारको टोली सक्रिय बनेको थियो। सोही क्रममा ५ लाख रुपैयाँ बुझ्ने क्रममा कर अधिकृत पाललाई रंगेहात नियन्त्रणमा लिइएको हो।

अख्तियार दुरुपयोग अनुसन्धान आयोग बर्दिबासका कार्यालय प्रमुख रामबहादुर कुरुम्वाङले कर अधिकृत पाललाई घुससहित पक्राउ गरिएको पुष्टि गर्दै घटनाबारे विस्तृत अनुसन्धान भइरहेको जानकारी दिएका छन्।

यस घटनाले कर प्रशासनमा पारदर्शिता, जवाफदेहिता र सुशासनमाथि पुनः गम्भीर प्रश्न उठाएको छ। अख्तियारले घटनामा अन्य व्यक्तिको संलग्नता रहे–नरहेको विषयमा समेत अनुसन्धान अघि बढाएको जनाएको छ।