महेश सिंह लहान सिरहा -“ सिरहाको लहान नगरपालिका–१ मा निर्माणाधीन पीसीसी सडक तथा नाला निर्माण योजनामा स्टिमेटअनुसार काम नभएको आरोप लगाउँदै स्थानीयवासीले विरोध जनाएका छन्।
स्थानीय प्रेम साह लगायत दर्जनौं बासिन्दाले निर्माण कार्यमा गुणस्तर कायम नगरिएको, प्राविधिक मापदण्डअनुसार काम नभएको तथा विकास बजेटको दुरुपयोग हुन सक्ने आशंका व्यक्त गरेका छन्। उनीहरूले सम्बन्धित निकायबाट निष्पक्ष प्राविधिक अनुगमन गरी वास्तविक अवस्था सार्वजनिक गर्न माग गरेका छन्।
मधेश प्रदेश सरकारको भौतिक पूर्वाधार विकास मन्त्रालयअन्तर्गत पूर्वाधार विकास कार्यालय, सिरहाको सहयोगमा सञ्चालन भइरहेको उक्त योजनाको सूचनापाटीअनुसार कुल लागत करिब रु. २० लाख ५३ हजार ९८६ रहेको छ। योजना अन्तर्गत राम विद्यालय यादवको घरदेखि लोकतान्त्रिक पीसीसी सडक ढलान तथा नाला निर्माण कार्य भइरहेको छ।
स्थानीयवासीको भनाइअनुसार निर्माण कार्य स्टिमेट र मापदण्डअनुसार नभएकाले भविष्यमा सडकको दिगोपनामा समेत असर पर्ने चिन्ता व्यक्त गरिएको छ। उनीहरूले सम्बन्धित निकायसँग तत्काल स्थलगत निरीक्षण, गुणस्तर परीक्षण तथा आवश्यक छानबिन गरी दोषीमाथि कारबाही गर्न माग गरेका छन्।
यद्यपि, स्थानीयले लगाएका आरोपबारे सम्बन्धित उपभोक्ता समिति, निर्माण पक्ष तथा पूर्वाधार विकास कार्यालयको आधिकारिक प्रतिक्रिया प्राप्त हुन सकेको छैन। प्रतिक्रिया प्राप्त भएमा त्यसलाई पनि समेटिनेछ।
Discussion about this post