महेश सिंह सिरहा लहान – सिरहाको भगवानपुर गाउँपालिकामा दाइजो प्रथा तथा बालविवाह विरुद्ध जनचेतना फैलाउने उद्देश्यले दुई दिने सडक नाटक कार्यक्रम सम्पन्न भएको छ। भगवानपुर गाउँपालिकाको आर्थिक सहयोग तथा सामाजिक वातावरण विकास केन्द्र, अर्नमा गाउँपालिका–५ सिरहाको आयोजनामा जेठ २२ र २३ गते कार्यक्रम सञ्चालन गरिएको हो।
मधेश प्रदेशका ख्यातिप्राप्त तथा चर्चित कलाकार बीएन पटेल, पल्लवी मिश्रा लगायतको कलाकार समूहले भगवानपुर गाउँपालिका परिसर, लक्ष्मीनारायण कौशल्या माध्यमिक विद्यालय, बलासुनसरी माध्यमिक विद्यालय तथा प्रहरी चौकी ठाडीमा सडक नाटक प्रस्तुत गरेका थिए।
नाटकमार्फत दाइजो प्रथा र बालविवाहका कारण समाजमा पर्ने नकारात्मक प्रभाव, बालबालिकाको शिक्षा तथा स्वास्थ्यमा हुने असर, महिला अधिकार र सामाजिक विकासका विषयलाई प्रभावकारी ढंगले प्रस्तुत गरिएको थियो। कलाकारहरूको जीवन्त अभिनयले दर्शकलाई भावुक बनाउनुका साथै सामाजिक कुरीति विरुद्ध सचेत हुन प्रेरित गरेको थियो।
आयोजक संस्थाका प्रतिनिधि रामेन्द्र यादवले समाजमा जरा गाडेर बसेका दाइजो प्रथा, बालविवाह लगायतका सामाजिक विकृति तथा विसंगति अन्त्य गर्न कार्यक्रम आयोजना गरिएको जानकारी दिए। यस्ता अभियानले समुदायमा सकारात्मक परिवर्तन ल्याउन महत्वपूर्ण भूमिका खेल्ने उनको विश्वास छ।
कार्यक्रममा स्थानीयवासी, विद्यार्थी, शिक्षक, अभिभावक तथा जनप्रतिनिधिहरूको उल्लेख्य उपस्थिति रहेको थियो। नाटक हेरेपछि स्थानीयहरूले समाज सुधारका लागि यस्ता जनचेतनामूलक कार्यक्रम प्रभावकारी रहेको भन्दै खुशी व्यक्त गरेका थिए।
“सचेत समाज, समृद्ध समाज—बालविवाह र दाइजो प्रथा अन्त्यको आधार” भन्ने नारासहित सञ्चालन गरिएको उक्त कार्यक्रमले सामाजिक कुरीति विरुद्ध जनस्तरमा चेतना अभिवृद्धि गर्न महत्वपूर्ण योगदान पुर्याएको सहभागीहरूको भनाइ रहेको छ।
Discussion about this post