सिरहाको लहानमा लैङ्गिक हिंसा विरुद्धको १६ दिने अभियान अन्तर्गत दिप प्रज्वलन

लहान, मंसिर २२ – समग्र जन उत्थान केन्द्र लहानद्वारा सञ्चालन भइरहेको लैङ्गिक हिंसा विरुद्धको १६ दिने अभियानको १२ औं दिन शुक्रबार साँझ लहानको सहिद चौकमा दीप प्रज्वलन गरी अभियानको विशेष कार्यक्रम सम्पन्न भएको छ।

जिवन ज्योति समाज लहानको समन्वय र सहकार्यमा आयोजित उक्त कार्यक्रममा समाजका विभिन्न क्षेत्रमा क्रियाशील व्यक्तित्वहरूको उल्लेखनीय सहभागिता रहेको थियो। कार्यक्रममा समग्रका अध्यक्ष राम भरोसी महतो, उपाध्यक्ष अनिता चौधरी, मानव अधिकारकर्मी देबराज पोखरेल, इन्सेकका प्रतिनिधि दुर्गा परियार, महिला अधिकारकर्मी गंगा अधिकारी, जीवन ज्योति समाज लहानका प्रमुख लक्ष्मेश्वर यादव र वरिष्ठ पत्रकार फिरोज सिद्दीकी लगायतको उपस्थिति रहेको थियो।

उक्त अवसरमा विभिन्न अधिकारकर्मीहरूले लैङ्गिक हिंसा विरुद्धको सचेतना अभिवृद्धि गर्दै समाजलाई समानता र न्यायपूर्ण बनाउन सबै पक्षको सक्रिय भूमिका आवश्यक रहेको बताए। सहिद चौकमा गरिएको दीप प्रज्वलनले अभियानप्रतिको ऐक्यबद्धता अभिव्यक्त गर्दै लैङ्गिक हिंसाको अन्त्यका लागि जनचेतना फैलाउने कार्यमा थप ऊर्जा प्रदान गर्ने विश्वास लिइएको छ।

१६ दिने अभियान अन्तर्गत समग्र जन उत्थान केन्द्रले आगामी दिनहरूमा पनि विभिन्न सचेतनामूलक कार्यक्रम सञ्चालन गर्ने योजना बनाएको छ।