महेश सिंह लहान सिरहा –सप्तरीको सुरुङ्गा नगरपालिका–१०, थलहामा प्रेम विवाहपछि दाइजोको लोभ र पारिवारिक दबाबका कारण एक नवविवाहिता युवती अमानवीय व्यवहारको शिकार बनेकी छन्।
थलहा निवासी नागेश्वर यादव (बम भोला) का छोरा नुनु यादव (२५) र सोही गाउँका तारा चन्द्र यादवकी छोरी प्रियंका यादव (२१) बीच दुई वर्षदेखि प्रेम सम्बन्ध थियो। एउटै जात–थर भएकाले टिकुलिया समाजको रोहबरमा असोज १ गते स्थानीय मन्दिरमा सामाजिक सहमतिमै उनीहरूको विवाह गराइएको थियो।
तर विवाहको भोलिपल्टैदेखि अवस्था उल्टियो। नुनु आफ्नै परिवारको दबाबमा घर छाडेर बेपत्ता भए भने नवविवाहिता प्रियंकालाई ससुराली परिवारले अँध्यारो कोठामा थुनी खाना–पानी समेत बन्द गरेको पीडित पक्षले दाबी गरेको छ। “भोक–प्यासले थाकेर आफैँ घर छोडून् भन्ने उद्देश्यले यस्तो व्यवहार गरिएको हो,” स्थानीयले भने।
केटाका काका शम्भुनाथ यादवले भने विवाह जबर्जस्ती गराइएको दाबी गर्दै बुहारी स्वीकार्न नसक्ने अडान लिएका छन्। तर गाउँलेहरूले भने दाइजोको लोभका कारण गरीब परिवारकी छोरीलाई अस्वीकार गरिएको आरोप लगाएका छन्।
यसबीच, घटनाबारे प्रहरी प्रशासनलाई उजुरी दिइए पनि मुद्दा दर्ता नभएको र पीडित पक्षको कुरा समेत नसुनेको स्थानीयले आरोप लगाएका छन्। यसले घटनामा राजनीतिक संरक्षण रहेको शंका थपिएको छ।
समाजका अगुवा, बुद्धिजीवी र स्थानीय राजनीतिकर्मीहरूले युवतीलाई कालकोठरीमा थुन्ने कार्यलाई अमानवीय भन्दै कडा आपत्ति जनाएका छन्। “प्रेम कुनै अपराध होइन, तर प्रेम गर्ने युवतीलाई यातना दिनु मानवता विरुद्धको अपराध हो,” उनीहरूको भनाइ छ।
सप्तरीमा यस घटनाले दाइजो प्रथा र पारिवारिक दबाबका कारण अझैसम्म प्रेम विवाहलाई सहज रूपमा स्वीकार नगरिएको कटु यथार्थ उजागर गरेको छ। पीडित प्रियंकाको सुरक्षा र न्याय सुनिश्चित गर्न राज्यले तत्काल कदम चाल्नुपर्ने स्थानीयको माग छ।
Discussion about this post