सिरहा— “हामी सबैको प्रतिबद्धता : लैङ्गिक हिंसा अन्त्यको लागि ऐक्यवद्धता” भन्ने नारासहित धनगढीमाई नगरपालिकामा ३३औं लैङ्गिक हिंसा विरुद्धको १६ दिने अभियानअन्तर्गत याली कार्यक्रमको आयोजना गरिएको छ। यो अभियान नोभेम्बर २५ देखि डिसेम्बर १० (मंसिर १० देखि २५) सम्म सञ्चालन हुनेछ।

धनगढीमाई नगरपालिका-११ मा मंसिर १० गते सम्पन्न यालीमा नगर उपप्रमुख संगिता चौधरीको प्रमुख उपस्थिति रहेको थियो। नगर क्षेत्रका सयौं विद्यार्थी, स्थानीय संघ-संस्था, जनप्रतिनिधि, र मानव अधिकारकर्मीको सहभागिता रहेको यो कार्यक्रमले लैङ्गिक हिंसाविरुद्धको चेतना प्रवाह गर्दै ऐक्यवद्धता जनायो।

कार्यक्रमको समन्वय महिला मानव अधिकार रक्षक सञ्जाल धनगढीमाई र मानव अधिकार संरक्षण केन्द्र सञ्जाल सिरहाले गरेका थिए। यसैगरी, समग्र जन उत्थान केन्द्र, लहान फिल्टर्स, र केयर नेपालले कार्यक्रम आयोजना गर्न सहयोग गरेका थिए।

अभियानको औपचारिक उद्घाटन

उद्घाटन समारोहमा बोल्दै नगर उपप्रमुख चौधरीले लैङ्गिक हिंसा अन्त्यका लागि समुदायस्तरमै सशक्त अभियान सञ्चालन गर्नुपर्नेमा जोड दिनुभयो। उहाँले भन्नुभयो, “लैङ्गिक हिंसा अन्त्यका लागि कानुन कार्यान्वयन मात्रै पर्याप्त हुँदैन। मानसिकता परिवर्तन र सामूहिक प्रतिबद्धता पनि जरुरी छ।”

समाजिक परिचालक एकेसा चौधरीले अभियानको महत्त्वबारे जानकारी दिँदै यो कार्यक्रम देशभरका विभिन्न संस्थाहरूको समन्वयमा सञ्चालन भइरहेको बताउनुभयो। “अभियानले महिला र बालबालिकामाथि हुने हिंसाका घटनाहरूलाई उजागर गर्न र त्यस्ता हिंसाको अन्त्य गर्न महत्त्वपूर्ण भूमिका खेल्छ,” चौधरीले भन्नुभयो।

लैङ्गिक हिंसाविरुद्धको १६ दिने अभियान

नोभेम्बर २५ (अन्तर्राष्ट्रिय महिला हिंसा विरुद्धको दिवस) देखि डिसेम्बर १० (अन्तर्राष्ट्रिय मानव अधिकार दिवस) सम्म सञ्चालन हुने यो अभियान विश्वव्यापी रूपमा मनाइन्छ। नेपालमा पनि विभिन्न संघ-संस्था र स्थानीय सरकारहरूको साझेदारीमा विविध कार्यक्रमको आयोजना हुँदै आएको छ।

यस पटक धनगढीमाई नगरपालिकामा आयोजित यालीले लैङ्गिक हिंसाविरुद्ध जनचेतना अभिवृद्धि गर्ने र समुदायलाई सचेत पार्ने प्रयास गरेको छ।

जनप्रतिनिधि र विद्यार्थीको सक्रियता

कार्यक्रममा विद्यालयस्तरका विद्यार्थीहरूको उत्साहजनक सहभागिता देखिन्थ्यो। प्लेकार्ड, ब्यानर, र नारासहित प्रदर्शन गरिएको यालीले स्थानीय बासिन्दाको ध्यान खिच्यो। “यो हाम्रो लागि सिकाइको अवसर हो। हामी सबैले हिंसाविरुद्ध एकजुट हुनुपर्छ,” सहभागी एक विद्यार्थीले भने।

नगरपालिकाका अन्य वडामा पनि विभिन्न जनचेतनामूलक कार्यक्रम गर्ने योजना रहेको नगरपालिकाले जानकारी दिएको छ।

यस प्रकारका अभियानले महिला र बालबालिकाको अधिकार संरक्षणमा महत्त्वपूर्ण योगदान पुर्‍याउने विश्वास आयोजकहरूको छ। “यस्ता कार्यक्रमले समाज परिवर्तन गर्ने थालनी गरिसकेको छ,” एक अधिकारकर्मीले बताए।