द्वन्द्व पीडित महिला र सिमान्तकृत समुदायलाई सहज पहुँचका लागी सशक्तीकरण

लहान, मंगलबार- समग्र जनउत्थान केन्द्र लहानले इन्टरनेशनल अलर्टको सहयोगमा महिला र सिमान्तकृत समुदायका लागि विशेष लैंगिक सुदृढीकरण कार्यक्रम सम्पन्न गरेको छ।लहान नगरपालिकाको सभा हलमा आयोजित कार्यक्रमले लैंगिक समानता र सुदृढ सामाजिक संरचना निर्माणमा केन्द्रित गर्दै समुदायका समस्या र समाधानका उपायहरूबारे व्यापक छलफल गरेको छ।
कार्यक्रमको अध्यक्षता सुधा यादवले गरिन्। कार्यक्रममा नगर र जिल्लास्तरका महिला नेतृहरू, सामाजिक अभियन्ता,पत्रकार,र द्वन्द्व पीडितहरूको उल्लेखनीय उपस्थिति थियो।सहभागीहरूले द्वन्द्वले प्रभावित परिवार र समुदायलाई शिक्षा र स्वास्थ्य सेवा उपलब्ध गराउन तत्कालीन योजना बनाउन जोड दिए।परियोजना अधिकृत रामकृपाल साहले न्यायको पहुँच सुनिश्चित गर्न महिला र सिमान्तकृत समूहहरूलाई संगठित बनाउनुपर्ने औँल्याए।

लहान नगरपालिकाका सबै वडामा द्वन्द्व पीडितहरूको हितमा कार्य गर्ने समूह गठन गरी उनीहरूलाई संगठित र सशक्त बनाउने योजना सार्वजनिक गरियो।
सामाजिक परिचालक नितु चौधरीले आगामी कार्य योजनाबारे जानकारी दिँदै द्वन्द्व पीडितहरूको सशक्तीकरणका लागि निरन्तर प्रयास गरिने बताइन्। उनले शिक्षा,स्वास्थ्य,न्याय,र आर्थिक स्वावलम्बनका क्षेत्रमा सकारात्मक परिणाम सुनिश्चित गर्न सबैको सहभागिता अपरिहार्य रहेको बताइन्।

सुधा यादवले द्वन्द्व पीडितहरूको अवस्था सुधारका लागि कार्यक्रमले मार्ग प्रशस्त गर्ने विश्वास व्यक्त गरिन्।साथै उनले महिलाको नेतृत्वदायी भूमिकालाई अझ प्रभावकारी बनाउन आह्वान गरिन्। कार्यक्रममा सहभागीहरूले आगामी योजनालाई प्रभावकारी बनाउन सुझाव दिएका थिए। समुदायका हरेक सदस्यलाई संगठित गर्दै द्वन्द्व पीडितहरूको अधिकार र न्याय सुनिश्चित गर्न साझा प्रतिबद्धता जनाइएको थियो।