सिरहा: क्यान महासंघको १५औं साधारण सभा तथा ७औं अधिवेशन सम्पन्न, नन्दकिशोर गुप्ता अध्यक्षमा निर्वाचित

सिरहा – कम्प्युटर एसोसिएसन नेपाल महासंघ (क्यान महासंघ) जिल्ला शाखा सिरहाको १५औं साधारण सभा तथा ७औं अधिवेशन भव्य रूपमा सम्पन्न भएको छ। लहानमा आयोजित कार्यक्रममा निबर्तमान अध्यक्ष संजय कुमार शर्मा ठाकुरको अध्यक्षतामा प्रमुख अतिथि लहान नगरपालिकाका नगर प्रमुख महेश प्रसाद चौधरीको विशेष उपस्थिति रहेको थियो।
क्यान महासंघको स्थापना र इतिहास
क्यान महासंघको स्थापना २०५६ सालमा सिरहाको लहानमा भएको थियो। सुरुआती दिनमा १० जना स्थानीय व्यवसायीको सक्रियतामा सुरु भएको यो संस्था सूचना प्रविधिको विस्तार र सुदृढीकरणका लागि कार्यरत छ। सिरहाको लहानलाई सूचना प्रविधिमा अगाडि बढाउने उद्देश्यले स्थापना भएको क्यान महासंघले विगत दुई दशकदेखि आईसीटी शिक्षाको प्रवर्द्धन, प्राविधिक तालिम तथा साइबर अपराध नियन्त्रणका क्षेत्रमा योगदान पुर्‍याउँदै आएको छ।
संस्थाका संस्थापक अध्यक्ष दीपेन्द्रराज सिंहका अनुसार, क्यान महासंघले विभिन्न तालिम र अभियान सञ्चालन गर्दै स्थानीय युवाहरुलाई प्रविधि सम्बन्धी सीप र जानकारी उपलब्ध गराउँदै आएको छ। गरिब, दलित, र पिछडिएका समुदायका विद्यार्थीहरुलाई स्थानीय शिक्षण संस्थाहरुमा अध्ययनको व्यवस्था गर्दै आईसीटी क्षेत्रको पहुँच सबैमा पु¥याउन महासंघ सक्रिय छ।
७औं अधिवेशनका मुख्य विषयवस्तु
कार्यक्रमलाई सम्बोधन गर्दै प्रमुख अतिथि महेश प्रसाद चौधरीले प्रविधिको महत्वमा जोड दिए। “यो युग कम्प्युटर र प्रविधिको युग हो। कुनै पनि क्षेत्रमा प्रगति गर्न प्रविधिको उपयोग अनिवार्य छ। लहान नगरपालिकाले क्यान महासंघसँग सहकार्य गरी स्थानीय युवालाई रोजगारी सिर्जना गर्न प्रतिबद्ध छ,” उनले भने।
मधेस प्रदेशका अध्यक्ष धन्नजे महतोले साइबर अपराध नियन्त्रण र सूचना प्रविधिको विकासलाई प्राथमिकतामा राख्ने बताउँदै सिरहामा सञ्चालन गरिएका तालिम तथा योजनालाई थप प्रभावकारी बनाउने प्रतिबद्धता व्यक्त गरे। केन्द्रिय सचिव भुपाल दास श्रेष्ठले सिरहालाई सूचना प्रविधिमा उत्कृष्ट बनाउने योजनाको खाका प्रस्तुत गरे।
निर्वाचित नेतृत्व र नयाँ समिति
अधिवेशनले क्यान महासंघ जिल्ला शाखा सिरहाका लागि नयाँ कार्यसमिति चयन गरेको छ। निर्वाचित पदाधिकारीहरु:
अध्यक्ष: नन्दकिशोर गुप्ता
उपाध्यक्ष: दीपेन्द्र महतो
सचिव: सुरेन्द्र कुमार महतो
कोषाध्यक्ष: सुनैना कुमारी सिंह कुशवाह
सहसचिव: धुनु महतो
सदस्यहरु: सन्तोषी कुमारी यादव, सन्तोष कुमार गुप्ता, मनोज कुमार यादव, भगवानलाल चौधरी, कुमोद कुमार यादव
कार्यक्रमको प्रमुख आकर्षण खुला सत्र र बन्द सत्र दुवैमा सदस्यहरुको उल्लेखनीय उपस्थिति रहेको थियो।
आगामी योजनाहरु
क्यान महासंघले आगामी दिनमा स्थानीय तहसँग सहकार्य गरी साइबर सुरक्षा सम्बन्धी जनचेतना अभियान, प्राविधिक तालिम कार्यक्रम, र स्थानीय शिक्षण संस्थाहरुसँगको सहकार्यमा प्रविधि शिक्षाको विस्तार गर्ने योजना बनाएको छ। गरिब र पिछडिएका वर्गका बालबालिकालाई सूचना प्रविधिमा आधारित शिक्षामा पहुँच पु¥याउन विशेष पहल गरिने बताइएको छ।
कार्यक्रमको समापनमा अध्यक्ष नन्दकिशोर गुप्ताले नवीन नेतृत्वले क्यान महासंघलाई अझ सशक्त बनाउने प्रतिबद्धता व्यक्त गरे।