सिरहा, नेपाल — नेपाल रेडक्रस सोसाइटी लहान उपशाखाले सिरहा जिल्लाभरका शाखा र उपशाखाका सभापतिहरूको सहभागितामा एकदिने रक्तसंचार कार्यशाला कार्यक्रम सफलतापूर्वक सम्पन्न गरेको छ। कार्यक्रममा लहान उपशाखाका सभापति फुलेश्वर महतोको अध्यक्षतामा कार्यक्रम सञ्चालन भएको थियो भने प्रमुख अतिथिका रूपमा लहान नगरपालिकाका उप-प्रमुख राम चलितर महतोले विशेष उपस्थिति जनाएका थिए। साथै, लहान वडा नं ३ का अध्यक्ष राम दयाल महतो विशेष अतिथिका रूपमा सहभागी थिए।
कार्यशालामा लहान प्रयोगशाला प्रमुख मनिष कुमार यादवले लहान नगरपालिकासँग भवन निर्माण र आर्थिक सहयोगको अपेक्षा राख्दै स्थानीय सरकारको ध्यानाकर्षण गराए। यादवले प्रयोगशालामा टाइल र मार्बल जडानमा समाजसेवी शंकर प्रसाद गुप्ता, राकेश झा, अशोक अमात्य, र राजा बाबु साहको महत्वपूर्ण योगदान रहेको जानकारी दिए।
हाल लहान उपशाखामा गाडी तथा अन्य स्रोतसाधनको अभावले रक्त संकलनमा चुनौती आएको जानकारी दिइएको छ। नेपाल रेडक्रस सोसाइटी सिरहा शाखाका सभापति राजदेब यादवले पनि आफ्नो उपस्थिति जनाउँदै, रक्त संकलन अभियानलाई थप प्रभावकारी बनाउन स्रोत साधनको व्यवस्थापनमा प्राथमिकता दिनुपर्नेमा जोड दिए।
नेपाल रक्त संचार सेवा केन्द्रका केन्द्रीय निर्देशक पवन गुप्ताले रेडक्रसद्वारा प्रदान गरिंदै आएको रक्तसंचार सेवाको प्रशंसा गर्दै, यसलाई अझ सुदृढ बनाउन स्थानीय सरकारको योगदान महत्त्वपूर्ण रहने बताए। उनले रक्त संचार प्रणालीलाई स्तरोन्नति गर्न जनतालाई आवश्यक तालिम र जनचेतनाको कमी रहेको र यसतर्फ ध्यान दिनुपर्ने बताए।
सिरहा जिल्लाका २४ उपशाखाहरू ग्रामीण क्षेत्रमा रक्तसंचार सेवा विस्तारमा सक्रिय रहँदै आएका छन्। कार्यशालामा ग्रामीण क्षेत्रहरूमा रक्तसंचार सेवाको प्रभावकारी पहुँच पुर्याउन सबैको सहकार्य आवश्यक रहेको चर्चा गरियो। कार्यक्रमको सञ्चालन परियागलाल यादवले गरेका थिए।
Discussion about this post