सिरहामा जसपाको संगठन विस्तार अभियान तीव्र, अभिमुखीकरण कार्यक्रम सम्पन्न

सिरहा, माघ १७ — जनता समाजवादी पार्टी (जसपा) नेपालले माघ मसान्तभित्र सिरहा जिल्लाको प्रत्येक नगर, वडा, र टोलमा पार्टी कमिटी गठन सम्पन्न गर्ने गरी संगठन विस्तार अभियान तीव्र पारेको छ। सिरहाको गोलबजारमा आयोजित अभिमुखीकरण कार्यक्रममा पार्टीका केन्द्र, प्रदेश, र स्थानीय तहका नेताहरूले पार्टीलाई जनस्तरसँग थप जोड्ने उद्देश्यका साथ कार्ययोजना सार्वजनिक गरेका छन्।
कार्यक्रममा पार्टीका केन्द्रीय अध्यक्ष उपेन्द्र यादवले मुलुकमा गणतन्त्र घोषणा भएको १६ वर्ष र बहुदलीय व्यवस्था स्थापनाको ३५ वर्ष बितिसक्दा पनि अपेक्षित विकास हुन नसकेको बताएका छन्। “सरकारी विद्यालयहरूलाई कमजोर बनाउने, कृषि र उद्योग क्षेत्रलाई धराशायी बनाउने काम कांग्रेस, एमाले र माओवादीले गरेका छन्,” अध्यक्ष यादवले भने, “१५७ वटा उद्योगहरू निजीकरणको नाममा कौडीको भाउमा बेचिए। अब जसपाले आर्थिक समृद्धि र समावेशीता कायम गर्न अग्रसरता लिनेछ।”

उनले मधेस आन्दोलनले समावेशीताको अवधारणालाई स्थापित गरेको उल्लेख गर्दै अब मधेस मात्र होइन, सम्पूर्ण नेपाली राजनीतिको नेतृत्व गर्ने समय आएको बताए। “देशमा कुनै रूपमा बहिष्कारमा परेका वा अन्यायमा परेका समुदायका लागि जसपा समाधानको मार्ग बनेको छ,” यादवले थपे।
पार्टीका केन्द्रीय सचिव सुरेश मण्डलले सिरहा जिल्ला संगठन निर्माणमा देशकै अगुवा रहेको जनाउँदै आगामी दुई महिनाभित्र संगठन विस्तार र जनताको निराशा हटाउने कार्यक्रम प्रभावकारी हुने बताए। उनले मधेस प्रदेशले विगतमा ठूलो राजनीतिक शक्ति निर्माण गरेको स्मरण गर्दै दुखलाई शक्तिमा बदलेर संघीयतालाई बलियो बनाउनुपर्नेमा जोड दिए।

कार्यक्रममा केन्द्रीय उपाध्यक्ष राजकिशोर यादवले वर्तमान नेपाली राजनीतिमा युवा शक्तिलाई कमजोर बनाएको आरोप लगाउँदै जसपाले आर्थिक विकासको नीति अवलम्बन गर्ने बताए। उनले कांग्रेस, एमाले र माओवादीले मुलुकलाई आर्थिक संकटतर्फ धकेलेको धारणा राख्दै जसपाले राजनीतिक स्थायित्व र आर्थिक समृद्धिका लागि मार्गनिर्देशन गर्ने बताए।
सिरहा क्षेत्र नम्बर ३ र ४ का अगुवा नेता तथा कार्यकर्ताको उल्लेखनीय सहभागिता रहेको कार्यक्रममा पार्टीका सिरहा जिल्ला अध्यक्ष अशोक यादव, केन्द्रीय उपाध्यक्ष राजकिशोर यादव, सचिव सुरेश मण्डल, चन्देश्वर पासमान, माननीय संजिला यादव, पूर्व माननीय सुनिता राम, परियाग लाल यादव, विद्यार्थी नेता दीपेश कुमार यादव, नागेन्द्र यादव, प्रेस मञ्च मधेस प्रदेश अध्यक्ष अमरेन्द्र यादव लगायतका नेताहरूको उपस्थिति थियो।
कार्यक्रमका क्रममा युवा नेता विजय कुमार यादवले चोहर्वा पुगेर केन्द्रीय अध्यक्ष उपेन्द्र यादवलाई गम्छा र फूलमालाले स्वागत गरेका थिए। यादव जसपाका पूर्व केन्द्रीय परिषद सदस्यसमेत हुन्।

अध्यक्ष यादवको नेतृत्वमा भएको अन्तरक्रिया कार्यक्रमले जनतामा उत्साह थपेको र संगठनलाई थप सुदृढ बनाउने अपेक्षा गरिएको आयोजक समितिले जनाएको छ।
कार्यक्रममा सहभागी नेताहरूले मधेस आन्दोलनले समावेशी समाज निर्माणमा योगदान दिएको चर्चा गरे। “२०१५ सालदेखि सुरु भएको आन्दोलनले मधेसको पहिचानलाई स्थापित गरेको छ,” यादवले भने, “अब यो पहिचानलाई राष्ट्रिय स्तरमा अगाडि बढाउनुपर्छ।”
जसपाले मधेसको मुद्दालाई राष्ट्रिय तहमा पुर्याउँदै अब सम्पूर्ण नेपालीको हितका लागि अग्रसर हुने प्रतिबद्धता जनाउँदै कार्यक्रम सम्पन्न भएको छ।