“गोलबजारमा वन कार्यालयको गस्ती टोलीद्वारा ९ थान सालको काठ बरामद”

सिरहा जिल्लाको लहानस्थित डिभिजन वन कार्यालय र सब-डिभिजन वन कार्यालय गोलबजार, चौहर्वाको संयुक्त गस्ती टोलीले वन क्षेत्रमा भइरहेको अवैध काठ तस्करीलाई नियन्त्रण गर्न महत्वपूर्ण सफलता हासिल गरेको छ। मंगलबार साँझ गोलबजार नगरपालिका-१०, धर्मपुरमा गरिएको विशेष अपरेसन अन्तर्गत उक्त गस्ती टोलीले ९ थान सालको काठ बरामद गर्न सफल भएको हो।
डिभिजन वन कार्यालयका वन अधिकृत मो. आविद हुसेनको नेतृत्वमा सञ्चालन गरिएको यो गस्ती अभियानले जंगलमा भइरहेको अवैध काठ चोरीलाई नियन्त्रण गर्न र संरक्षणको क्षेत्रमा थप चुनौतीहरूसँग सामना गर्न वन अधिकृत टोलीको सक्रियता देखाएको छ।
डिभिजन वन कार्यालयका अनुसार, चोरी काठ सम्बन्धी गोप्य सूचनाको आधारमा उक्त अभियान सञ्चालन गरिएको थियो। यस अपरेसनको क्रममा तस्करहरूले जंगलबाट चिरान गरेर तयार गरिएको सालको काठ विभिन्न माध्यमबाट चोरी निकासी गर्न लागेको अवस्थामा पक्राउ गरिएको हो।
वन संरक्षणको लागि स्थानीय समुदाय र सम्बन्धित निकायहरूको सहकार्यलाई जोड दिँदै अधिकृत हुसेनले अवैध काठ तस्करी रोक्न गस्तीलाई थप सशक्त बनाउने योजना रहेको जनाएका छन्। चोरी काठलाई बरामद गरी हाल थप अनुसन्धान र आवश्यक कारबाही प्रक्रिया अघि बढाइएको जनाइएको छ।
यो सफलता डिभिजन वन कार्यालय सिरहा र सब-डिभिजन वन कार्यालय गोलबजारको वन संरक्षण र अवैध काठ तस्करी नियन्त्रणको अभियानमा ठूलो टेवा पुग्ने विश्वास गरिएको छ।