कर्मचारीको क्षमता विकासमा स्वावलम्बन लघुवित्तद्वारा दुईदिने तालिम सफल

– स्वावलम्बन लघुवित्त वित्तीय संस्था लिमिटेडले आफ्ना बरिष्ठ सहायक तथा सहायक तहका कर्मचारीहरूको क्षमता र दक्षता वृद्धिका लागि दुईदिने क्षमता अभिवृद्धि तालिम सफलतापूर्वक सम्पन्न गरेको छ। तालिम सुनसरीको गोकर्ण रिसोर्ट, साकुरा एडभेन्चरमा आयोजित भएको हो।
कार्यक्रममा वित्तीय संस्थाका तालिम विभाग प्रमुख मोहित नारायण यादवको प्रमुख आतिथ्यमा इटहरी, सुनसरीस्थित इलाका कार्यालयअन्तर्गतका १० शाखा कार्यालयहरूमा कार्यरत २१ जना कर्मचारीहरूको सक्रिय सहभागिता रह्यो।
तालिमको दौरान, फिक्कल इलाम शाखाका सहायक प्रबन्धक मनोज न्यौपानेको मस्तिष्कघातका कारण असामयिक निधन भएकोमा शोक प्रकट गर्दै एक मिनेट मौनधारण गरिएको थियो। तालिममा सहभागी २६ जना कर्मचारीहरूले सोही साँझ स्व. न्यौपानेको परिवारलाई भेटी समवेदना व्यक्त गरे।

तालिममा समय व्यवस्थापन, ग्राहक सम्बन्ध विकास, ऋण असुली व्यवस्थापन, समस्या समाधान, निर्णय क्षमतामा वृद्धि, मार्केटिङ र जोखिम व्यवस्थापनका विषयमा गहन छलफल र व्यावहारिक अभ्यास गरियो। सहभागीहरूलाई समूह छलफल, व्याख्यान र अभिनयजस्ता विधिहरू प्रयोग गरी आवश्यक सीप हस्तान्तरण गरिएको थियो।

समापन समारोहमा सहभागी कर्मचारीहरूले तालिमको गुणस्तरीय व्यवस्थापन र तालिमका सहजकर्ताहरूको प्रस्तुति अत्यन्त सराहनीय रहेको प्रतिक्रिया दिए। तालिम मूल्यांकन समितिका संयोजक रोशन तिमल्सिनाले सहभागीहरूको तर्फबाट तालिममा सिकाइएका सीपहरू इमान्दारीपूर्वक कार्यक्षेत्रमा लागू गर्ने प्रतिबद्धता व्यक्त गरे।
सहभागीहरूलाई तालिम सहज गर्न तालिम विभागका अधिकारीहरू र इटहरी इलाका कार्यालयका कर्मचारीहरूले उल्लेखनीय भूमिका निर्वाह गरेका थिए।