महेश सिंह, लहान–सिरहा । लहान मनकामना अस्पताल तथा प्रसूति गृह प्रालिले रक्तदान कार्यक्रम आयोजना गर्दै स्थानीय समुदायमा स्वास्थ्य सेवासँगै सामाजिक उत्तरदायित्वका गतिविधिलाई समेत निरन्तरता दिएको छ।
नेपाल रेडक्रस सोसाइटी, लहान शाखाको प्राविधिक सहयोगमा अस्पताल परिसरमा आयोजित रक्तदान कार्यक्रममा अस्पतालका कर्मचारी, सगरमाथा एम्बुलेन्स संघका सदस्य तथा सर्वसाधारण गरी २५ जनाले रक्तदान गरेका छन्।
अस्पतालका सञ्चालक बिरिदेव महतोका अनुसार आकस्मिक उपचार तथा विभिन्न स्वास्थ्य समस्याका कारण अस्पतालमा रगत आवश्यक पर्ने अवस्थालाई मध्यनजर गर्दै रक्तदान कार्यक्रम आयोजना गरिएको हो। उनले रक्तदानजस्तो मानवीय सेवामा सहभागी हुने सबैलाई धन्यवाद दिँदै आगामी दिनमा पनि सामाजिक उत्तरदायित्वका कार्यक्रमलाई निरन्तरता दिने बताए।
अस्पतालका प्रशासन प्रमुख रोशन कुशवाहाले रक्तदानले आपत्कालीन अवस्थामा हुने रगतको अभाव न्यूनीकरण गर्न सहयोग पुग्ने बताए। उनले स्वस्थ व्यक्तिलाई नियमितरूपमा रक्तदान गर्न आग्रह गरे।
लहान मनकामना अस्पताल स्थानीयस्तरमा आर्थिकरूपमा कमजोर, दलित तथा मध्यमवर्गीय समुदायलाई लक्षित गरी स्वास्थ्य सेवा प्रदान गर्दै आएको अस्पतालका सञ्चालकको भनाइ छ। अस्पतालले कम खर्चमा विभिन्न जटिल तथा दीर्घरोगको उपचार सेवा उपलब्ध गराउँदै आएको जनाएको छ।
अस्पतालका अनुसार दक्ष तथा अनुभवी स्वास्थ्यकर्मी र प्राविधिकको संलग्नतामा बिरामीलाई उपचार सेवा प्रदान गरिँदै आएको छ। स्वास्थ्य उपचारसँगै समुदायमा रक्तदान, जनचेतना तथा सामाजिक सेवाका कार्यक्रमलाई पनि प्राथमिकतामा राखिएको अस्पतालले जनाएको छ।
रक्तदान कार्यक्रममा सहभागी अस्पतालका कर्मचारी, सगरमाथा एम्बुलेन्स संघका सदस्य तथा सर्वसाधारणप्रति अस्पताल परिवारले धन्यवाद व्यक्त गरेको छ। कार्यक्रमका लागि प्राविधिक सहयोग उपलब्ध गराएको नेपाल रेडक्रस सोसाइटी, लहान शाखाप्रति समेत अस्पतालले आभार व्यक्त गरेको छ।
Discussion about this post