सिरहाका विद्यालयहरूमा न्यानो स्कुल पोसाक वितरण अभियान

सिरहा — सिरहा जिल्लामा आर्थिक रूपमा विपन्न र शारीरिक रूपमा असक्षम समुदायको जीवनमा आशाको किरण थप्दै, वरिष्ठ समाजसेवी तथा सामाजिक चिन्तक अशोक खड्काले समाजसेवाको अभियानलाई विशेष रूपमा अघि बढाएका छन्। पद्मोदय फाउन्डेसन, धनगढीका संरक्षक खड्काले, विशेषगरी दलित, जनजाति, तथा आर्थिक दृष्टिले कमजोर समुदायका लागि शिक्षा र स्वास्थ्यको पहुँच पुर्याउन अभूतपूर्व योगदान पुर्याउँदै आइरहेका छन्। यसै परिप्रेक्ष्यमा, खड्काको नेतृत्वमा फाउन्डेसनले सिरहाका विभिन्न विद्यालयहरूमा स्कुल पोसाक र ह्वीलचेयर वितरण कार्यक्रम सञ्चालन गरेको छ।

पोसाक र ह्वीलचेयर वितरण कार्यक्रम

बुधबार सिरहाको नवराज र सुखीपुरको दहीपौडीमा तथा बिहीबार बार धनगढीमाई नगरपालिका वडा नं. ३ स्थित कुरवा हनुमान नगरको दलित जनजातीय आधारभूत विद्यालयमा विधिवत् कार्यक्रम गरी दर्जनौं अपाङ्गता भएका असहाय व्यक्तिहरूलाई ह्वीलचेयर तथा सयौं विद्यार्थीलाई जाडो याममा लगाउने न्यानो स्कुल पोसाक वितरण गरियो। कार्यक्रममा विद्यालय व्यवस्थापन समितिका अध्यक्ष बिरेन्द्र साहको रोहबरमा विद्यालयका प्रधानाध्यापक भगतलाई पोसाकको जिम्मा लगाइएको थियो।

खड्काको भनाइमा, आफ्नो जन्मभूमिमा शिक्षा र स्वास्थ्यको अभावले जीवनयापन गर्न कठिनाइ भोगिरहेका समुदायका सदस्यहरूलाई प्रत्यक्ष रूपमा सहयोग पुर्याउँदा उहाँलाई सन्तुष्टि मिलेको छ। “गरिबी र असक्तताको कारणले शिक्षाबाट वञ्चित हुनु परेको पीडादायी अवस्था देख्दा मन नै बिझाउँछ,” खड्काले भने। “तपाईंहरूलाई थोरै भए पनि मद्दत पुगोस भन्ने मेरो चाहना हो।”

विद्यालयको व्यवस्थापन र समुदायको सहभागिता

कार्यक्रममा विद्यालय व्यवस्थापन समितिका अध्यक्ष तथा स्थानीय वडाका अध्यक्ष बिरेन्द्र साह, उपाध्यक्ष सरिता चौधरी, कोषाध्यक्ष गंगाराम महतो, पूर्व वडाध्यक्ष देबन्नद्न साह, तथा विद्यालयका प्रधानाध्यापक लगायत विद्यालय परिवारका अन्य सदस्यहरूको उपस्थिति थियो। कार्यक्रमको औपचारिक सुरुवात विद्यालय व्यवस्थापन समितिका अध्यक्ष दीपेन्द्र महतो र सचिव रामकुमार महतोले गरेका थिए। सहभागीहरूले खड्काको योगदानको खुलेर प्रशंसा गर्दै यस प्रकारको सहकार्यले विद्यालयमा अध्ययनरत विपन्न विद्यार्थीहरूको मनोबलमा सकारात्मक असर पर्ने विश्वास व्यक्त गरे।

विद्यालय व्यवस्थापन समितिका अध्यक्ष महतोले भने, “हाम्रो विद्यालयमा अधिकांश विद्यार्थीहरू आर्थिक रूपमा विपन्न पारिवारिक पृष्ठभूमिबाट आउनुभएको छ। खड्का जस्ता समाजसेवीहरूले यसरी सहयोग गर्दै आउनु भएकोमा हामी उहाँप्रति आभार व्यक्त गर्दछौं।” कार्यक्रमका दौरान खड्काले विद्यालय परिवारलाई आफ्नो अभियान निरन्तर रूपमा अगाडि बढाउने आश्वासन पनि दिए। 

भविष्यका योजना

पद्मोदय फाउन्डेसनले यसअघि पनि शिक्षा, स्वास्थ्य, र आधारभूत सुविधाका क्षेत्रमा थुप्रै कार्यहरू गर्दै आएको छ। आगामी दिनमा पनि फाउन्डेसनले विभिन्न विद्यालयहरूमा आधारभूत शैक्षिक सामग्री, पोसाक, खेलकुद सामग्री, तथा स्वास्थ्यसम्बन्धी कार्यक्रमहरू सञ्चालन गरी स्थानीय समुदायलाई सहयोग पुर्याउने योजनामा छ। खड्काले आफ्नो अभियानलाई निरन्तरता दिन जति सकिन्छ, सहयोग गर्दै जाने प्रतिबद्धता व्यक्त गरेका छन्।
खड्काले थपे, “समाजको सेवामा मैले जुन बाटो रोजेको छु, त्यसमा अगाडि बढिरहनेछु। विपन्न समुदायका बालबालिकाहरू शिक्षाबाट वञ्चित हुन नपरोस् भन्ने हाम्रो प्रमुख लक्ष्य हो। हाम्रो अभियानमा जोडिन चाहने हरेकलाई हामी स्वागत गर्छौं।”
यसरी, समाजसेवा र समुदायको सशक्तीकरणको विचार बोकेर अशोक खड्काले फाउन्डेसनको माध्यमबाट गरेका यस्ता कार्यहरूले समाजमा सकारात्मक प्रभाव पार्दै आएको छ।