लहान नगरपालिका-१९ मा युवा पुस्तालाई कुलतबाट जोगाउने र राष्ट्रका लागि खेलकुदलाई पहिचानको माध्यम बनाउने उद्देश्यले विशेष खेलकुद कार्यक्रम सम्पन्न भएको छ। यस कार्यक्रमको आयोजना नेपाल एकीकृत समाजवादी पार्टीले नगर अध्यक्ष बिनोद साहको नेतृत्वमा गरेको हो।
कार्यक्रमका प्रमुख अतिथि पूर्व कानुन मन्त्री प्रमोद यादवले खेलकुदले युवाहरूलाई अनुशासन र सकारात्मक ऊर्जा प्रदान गर्ने बताए। उनले भने, “खेलकुद मात्रै यस्तो माध्यम हो जसले शारीरिक र मानसिक दुवै तवरले युवालाई स्वस्थ राख्न सहयोग गर्छ। यसका साथै, यो राष्ट्रलाई अन्तर्राष्ट्रिय स्तरमा चिनाउने माध्यम पनि हो।”
कार्यक्रममा पार्टीका वरिष्ठ नेता चन्द्र नारायण यादव, राम चन्द्र यादव, र राम दयाल यादवको समेत उपस्थिति थियो। सयौं कार्यकर्ता र स्थानीय युवाहरूको सहभागिता रहेको कार्यक्रममा खेलकुदका विभिन्न गतिविधिहरू सञ्चालन गरिएका थिए।
नगर अध्यक्ष बिनोद साहले यस प्रकारका कार्यक्रमले युवा पुस्तालाई कुलत र विकृतिबाट जोगाउन र उनीहरूलाई राष्ट्र निर्माणमा योगदान गर्न प्रेरित गर्ने बताए। उनले स्थानीय युवाहरूलाई खेलकुदमा सहभागी गराउन भविष्यमा थप यस्ता कार्यक्रम गर्ने प्रतिवद्धता व्यक्त गरे।
कार्यक्रममा उपस्थित स्थानीयले पनि खेलकुदको महत्व र यसको प्रभावकारीता माथि जोड दिए। सहभागीहरूले कार्यक्रमको प्रशंसा गर्दै यसलाई निरन्तरता दिन आग्रह गरेका छन्।
कार्यक्रमको समापनमा उत्कृष्ट प्रदर्शन गर्ने खेलाडीहरूलाई पुरस्कार वितरण गरिएको थियो।
Discussion about this post