बर्धमान अस्पतालले उपचारमा कुनै लापरबाही नगरेको डा.यादवको दाबी

सिरहा, नेपाल – सिरहाको गोलबजार स्थित बर्धमान अस्पतालमा सिरहा जिल्ला औरही गाउँपालिकाकी राधा दासलाई सुत्केरी व्यथा भएपछि उनलाई थप उपचारका लागि उक्त अस्पतालमा ल्याइएको थियो। जिल्ला अस्पताल सिरहाका चिकित्सकहरूले थप उपचारका लागि सुविधासम्पन्न अस्पतालमा लैजान सल्लाह दिएपछि राधालाई परिवारले बर्धमान अस्पतालमा भर्ना गरेका थिए। अस्पतालमा चिकित्सकहरूले शल्यक्रियाको आवश्यकता देखाउँदै तुरुन्तै शल्यक्रिया गरे।
शल्यक्रिया सफल भए पनि नवजात शिशुको स्वास्थ्य अवस्था कमजोर रहेकोले आईसीयूमा राखेर उपचार गर्नुपर्ने चिकित्सकहरूले बताए। बर्धमान अस्पतालमा आईसीयू खाली नभएपछि शिशुलाई लाहानस्थित सप्तरीशी अस्पतालमा रेफर गरिएको थियो। तर दुर्भाग्यवश, शिशुको लाहान अस्पतालमा पुर्‍याउनासाथ नै मृत्यु भएको चिकित्सकहरूले घोषणा गरे।
यस घटनाबाट परिवार शोकमा डुबेका छन्। शिशुको अन्तिम संस्कार परम्पराअनुसार गागन खोलामा गरिएको छ। घटना सम्बन्धमा जिल्ला प्रहरी कार्यालय, गोलबजारका प्रहरी निरीक्षक गोविन्द प्रसाद साहको नेतृत्वमा अनुसन्धान टोलीले आवश्यक जानकारी लिँदै शिशुको शव पोस्टमार्टमका लागि प्रादेशिक अस्पताल, लहानमा पठाइएको थियो।
बर्धमान अस्पतालका प्रमुख सर्जन डा. तेज शंकर यादवले यस घटनामा अस्पताल र चिकित्सकको कुनै लापरबाही नरहेको दाबी गरेका छन्। पत्रकार सम्मेलनमा डा. यादवले भने, “शिशुको मृत्युसम्बन्धी केही समाचार माध्यमले फैलाएको अफवाह सत्य होइन। अस्पताललाई बदनाम गर्ने उद्देश्यले यस्तो भ्रामक समाचार सम्प्रेषण गरिएको छ।”
डा. यादवले यसरी नकारात्मक समाचार सम्प्रेषण गर्दा स्वास्थ्यकर्मीहरूको मनोबलमा असर पर्ने जनाउँदै घटनाबारे स्पष्टिकरण दिएका छन्। बर्धमान अस्पतालमा राधा दासको उपचार जारी छ, र अस्पताल व्यवस्थापनले परिवारजनलाई पूरा सहयोग गरिरहेको छ।