कमला नदी किनारमा भूत मेला: धामी–झाँक्रीको दैवी ताण्डव र जनसागर

सिरहा र धनुषा जोड्ने कमला नदीमा आज ‘भूत मेला’ विशेष धूमधामका साथ सम्पन्न भएको छ। कार्तिक शुक्ल पूर्णिमाको अवसर पारेर आयोजना हुने यो मेला धार्मिक र सांस्कृतिक दृष्टिकोणले विशिष्ट मानिन्छ। दैवी शक्तिको आराधना गर्दै भूतप्रेतको शमन गर्ने प्रचलनले यहाँ स्थानीय धामी–झाँक्री र श्रद्धालुहरूको भीड लागेको छ।
भक्तजन र धामीहरूको भीडले भरिएको नदी तटमा मृदङ्ग, झ्याली, ढोल र पिपहीको सांगीतिक तालसँगै ‘भगैत’ भाका गुञ्जिएको छ। भगतिया, अर्थात् ठेट मैथिली भाकामा स्तुति गाउनेहरू, देवता र दैवी शक्तिको स्तुति गाउँदैछन्। यस बीचमा धामीहरू माटोको ढकनामा आगो भर्राउँदै र दैवी रौद्रता प्रकट गर्दै नदीको किनारमा ताण्डव नृत्य प्रस्तुत गरिरहेका छन्। उनीहरूको हातमा आगोले भरिएको ढकना हुन्छ, जसलाई नचाउँदै सिंहनादसहित अद्भुत कौशल प्रदर्शन गर्दछन्।

धामी मोचाइका अनुसार, यो विशेष दिनलाई सतवैद्य समारोहको रूपमा मानिन्छ। नयाँ धामीहरूले यस दिन कमला नदीलाई गंगा समान पवित्र मानी स्नान गर्दछन्। यो अवसरमा उनीहरूले समाज र जनहितका लागि मात्रै शक्तिको प्रयोग गर्ने शपथ लिन्छन्। स्थानीय विश्वास अनुसार, दैवी शक्तिको उपयोगले भूत–प्रेतको सन्तापबाट जनतालाई मुक्ति दिलाउने र रोग–व्याधिबाट रक्षा गर्ने परम्परा रहेको छ।
कमला नदीको धार्मिक महत्त्वका कारण यहाँको मेला एक प्रकारको सांस्कृतिक उत्सव बनेको छ। सिरहा, धनुषा लगायत आसपासका जिल्लाका हजारौं भक्तजन यो मेलामा सामेल हुन आएका छन्। गंगा स्नानको सामर्थ्य नभएका लागि कमला नदीमा स्नान गरेर पाप मोचन गर्ने जनविश्वास छ।