महेश सिंह, लहान–सिरहा । एनएमबी बैंक लहान शाखाले विद्यार्थीमा वित्तीय ज्ञान अभिवृद्धि गर्ने उद्देश्यले वित्तीय साक्षरता तथा अभिमुखीकरण कार्यक्रम सम्पन्न गरेको छ।
सिरहाको लहान नगरपालिका–८ स्थित लहान मनोकामना कलेजमा अध्ययनरत विद्यार्थीलाई लक्षित गरी आयोजित कार्यक्रममा शेयर बजार, शेयर मूल्य, डिम्याट खाता, बचत तथा व्यक्तिगत आर्थिक व्यवस्थापनलगायत विषयमा जानकारी दिइएको थियो।
कार्यक्रममा विद्यार्थीलाई आम्दानीअनुसार बचत गर्ने तरिका, वित्तीय सेवाको प्रयोग, शेयर बजारसम्बन्धी आधारभूत जानकारी तथा डिम्याट खाताको उपयोगबारे अभिमुखीकरण गरिएको आयोजकले जनाएको छ। कार्यक्रममा उल्लेख्य सङ्ख्यामा विद्यार्थीको सहभागिता रहेको थियो।
वित्तीय साक्षरता कार्यक्रमको सहजीकरण एनएमबी बैंक लहान शाखाका कर्मचारी सन्तोषकुमार यादव र धर्मेन्द्रकुमार यादवले गरेका थिए। कार्यक्रममा कलेजका प्रिन्सिपल कमलेशकुमार यादवको समेत उपस्थिति रहेको थियो।
प्रिन्सिपल यादवले विद्यार्थी जीवनमै वित्तीय ज्ञान तथा आर्थिक व्यवस्थापनसम्बन्धी सीप विकास गर्न आवश्यक रहेको बताए। यस्ता कार्यक्रमले विद्यार्थीलाई बचत, लगानी र वित्तीय सेवाको सही प्रयोगबारे व्यवहारिक ज्ञान प्राप्त गर्न सहयोग पुग्ने उनको भनाइ थियो।
उनले पछिल्लो समय विद्यार्थीका लागि वित्तीय साक्षरता अत्यन्त आवश्यक बन्दै गएको उल्लेख गर्दै शिक्षासँगै आर्थिक तथा वित्तीय ज्ञानसम्बन्धी तालिमलाई पनि प्राथमिकता दिनुपर्ने बताए।
एनएमबी बैंकले विद्यार्थी तथा युवामा वित्तीय चेतना अभिवृद्धि गर्ने उद्देश्यले वित्तीय साक्षरता कार्यक्रमलाई निरन्तरता दिँदै आएको जनाएको छ।
Discussion about this post