पूर्व मन्त्री यादवद्वारा खेलकुदमा सरकारी सहयोगको प्रतिबद्धता,आयोजक टिम बिजय

सिरहा, कार्तिक २८ – युवाहरूलाई कुलतबाट जोगाएर स्वस्थ र सकारात्मक बाटोमा डो-याउन, बजरंग युवा क्रिकेट क्लब गेरुवाहाले सिरहा जिल्लामा भव्य जिल्लास्तरीय क्रिकेट टुर्नामेन्टको आयोजना गर्‍यो। कार्तिक १७ गतेदेखि सञ्चालनमा आएको यो प्रतियोगितामा जिल्लाका विभिन्न स्थानका आठ वटा उत्कृष्ट टोलीहरूले भाग लिएका थिए। क्लबका संयोजक मनोज कुमार यादवले बताउनुभएको अनुसार, टुर्नामेन्टले मधेसका युवाहरूलाई खेलकुदमा आकर्षित गर्दै, उनीहरूलाई समाजमा सकारात्मक भूमिका निर्वाह गर्न प्रोत्साहित गर्ने उद्देश्य राखेको थियो।

फाइनल खेलमा रोमाञ्चक प्रतिस्पर्धा : आयोजक टोलीको शानदार जीत

शनिबार सम्पन्न फाइनल खेलमा आयोजक “गेरुवाहा क्रिकेट क्लब” र “सरस्वती युवा क्रिकेट क्लब लहान” बीच भएको प्रतिस्पर्धा दर्शकहरूका लागि अत्यन्त रोमाञ्चक बन्यो। सरस्वती क्रिकेट क्लबले दिएको १२० रनको लक्ष्यलाई पछ्याउँदै आयोजक टोलीले उत्कृष्ट प्रदर्शन गर्दै ७ ओभर बाँकी राखी बिजय हासिल गर्‍यो। राष्ट्रिय अनुसन्धान विभागका प्रहरी नायव निरीक्षक तथा क्लबका सचिव रिझन यादवले जानकारी दिनुभएको अनुसार, खेलभरि दुवै टोलीले उत्कृष्ट खेल प्रदर्शन गरेका थिए, जसले सम्पूर्ण खेलप्रेमीहरूलाई आनन्दित बनायो।

विजेता र उपविजेता टिमलाई भव्य सम्मान

विजेता गेरुवाहा क्रिकेट क्लबलाई नगद रु. ११ हजार, सिल्ड ट्रफी र प्रमाणपत्र प्रदान गरिएको थियो। उपविजेता सरस्वती युवा क्रिकेट क्लबलाई नगद रु. ६ हजारसहित सम्मान गरिएको क्लबका अध्यक्ष राम बालक यादवले जानकारी गराउनुभयो। टुर्नामेन्टको समापन कार्यक्रममा अध्यक्ष यादवले क्लबले सिरहा जिल्लाको खेलकुद क्षेत्रमा लामो समयदेखि योगदान पुर्‍याउँदै आएको बताउँदै, युवाहरूलाई खेलकुदमा सहभागी गराउन र तिनीहरूको प्रतिभालाई प्रोत्साहित गर्नका लागि यस्ता प्रतियोगिताहरूको आयोजना महत्वपूर्ण रहेको औंल्याउनुभयो।

मधेस प्रदेशका पूर्व कृषि राज्य मन्त्री संजय कुमार यादवद्वारा खेलकुदमा सरकारी सहयोगको प्रतिबद्धता

समापन समारोहका प्रमुख अतिथि मधेस प्रदेशका पूर्व कृषि राज्य मन्त्री संजय कुमार यादवले मधेसका युवाहरूको खेलकुदमा बढ्दो रुचिलाई ध्यानमा राख्दै खेलकुद क्षेत्रको स्तरवृद्धिका लागि प्रदेश सरकारको तर्फबाट सहयोग गर्ने प्रतिबद्धता जनाउनुभयो। उहाँले मधेस प्रदेशबाट पनि राष्ट्रिय तथा अन्तर्राष्ट्रिय स्तरका खेलाडी उत्पादन गर्न खेलकुद एकेडेमीको स्थापनाको आवश्यकता रहेको बताउँदै खेलकुदमा आवश्यक पूर्वाधार र सुविधाको व्यवस्थापनमा प्रदेश सरकारले सहयोग पुर्‍याउने विश्वास दिलाउनुभयो।

बजरंग युवा क्लबको दीर्घकालीन योगदान र समाजिक रुपान्तरणमा भूमिका

बजरंग युवा क्रिकेट क्लब गेरुवाहाले विगत २२ वर्षदेखि शिक्षा, स्वास्थ्य, खेलकुदजस्ता विभिन्न सामाजिक गतिविधिहरूमा सक्रिय योगदान पुर्‍याउँदै आएको छ। समाजमा सकारात्मक परिवर्तन ल्याउन बौद्धिक र जोशिला युवाहरूको समूहले स्थापना गरेको यस क्लबले विभिन्न कार्यक्रमहरू सञ्चालन गरेर युवालाई स्वस्थ र सकारात्मक जीवनशैलीतर्फ उन्मुख गराएको छ। क्लबले मधेस प्रदेशको समाजिक रुपान्तरणका साथै युवाहरूको व्यक्तिगत र शारीरिक विकासमा पनि महत्त्वपूर्ण भूमिका निर्वाह गरेको छ। क्लबका अध्यक्ष राम बालक यादवका अनुसार, खेलले युवाहरूलाई शारीरिक रुपमा तन्दुरुस्त राख्नुका साथै मानसिक स्वास्थ्यमा समेत सकारात्मक प्रभाव पार्छ।

समग्रमा, सिरहामा सम्पन्न यो जिल्लास्तरीय क्रिकेट टुर्नामेन्टले मधेस प्रदेशमा खेलकुदको महत्त्व र सम्भावनालाई उजागर गरेको छ। युवाहरूलाई खेलकुदमा आकर्षित गर्न यस्ता कार्यक्रमहरूले थप प्रेरणा मिल्ने विश्वास व्यक्त गर्दै आगामी दिनहरूमा समेत यस्तै कार्यक्रमको आयोजना गर्दै जाने क्लबले प्रतिबद्धता जनाएको छ।