सनातन धर्मको ज्ञान र सांस्कृतिक चेतना विस्तारमा जोड दिँदै विश्व हिन्दू परिषद् सिरहा

महेश सिंह,लहान सिरहा— विश्व हिन्दू परिषद् नेपाल, सिरहाको आयोजनामा सिरहाको नवराजपुर गाउँपालिका–४, सोनवर्षा बजारस्थित श्री जय माँ हजारी इङ्लिस बोर्डिङ स्कुलमा बडादसैँको अवसरमा शुभकामना आदानप्रदान कार्यक्रम सम्पन्न भएको छ।

विश्व हिन्दू परिषद् नेपालका सिरहा जिल्ला अध्यक्ष शिवदेव साहको अध्यक्षतामा सम्पन्न कार्यक्रममा नेपाल बीबीसीका पत्रकार महेश सिंह प्रमुख अतिथि रहनुभएको थियो। कार्यक्रममा उहाँले सनातन हिन्दू धर्म, संस्कृति र परम्पराको संरक्षणका लागि गाउँगाउँमा संगठित रूपमा जनचेतनामूलक कार्यक्रम सञ्चालन गर्नुपर्नेमा जोड दिनुभयो।

धर्मसम्बन्धी ज्ञान प्रत्येक हिन्दू धर्मावलम्बीका लागि आवश्यक रहेको उल्लेख गर्दै उहाँले धार्मिक तथा सांस्कृतिक परम्पराको महत्त्वबारे समुदायस्तरमा चेतना अभिवृद्धि गर्नुपर्ने बताउनुभयो। उहाँले धर्म र संस्कृतिको संरक्षणका लागि नयाँ पुस्तालाई समेत परम्परासँग जोड्नुपर्ने धारणा राख्नुभयो।

कार्यक्रममा विशिष्ट अतिथिका रूपमा सीमा प्रहरी चौकी झाझपट्टीका इन्चार्ज सहायक प्रहरी निरीक्षक डम्बर दियालीको उपस्थिति रहेको थियो। त्यसैगरी ज्ञानेन्द्र विक्रम यादव, पवन यादव, शिवराम यादवसहित विभिन्न व्यक्तित्वहरूको सहभागिता रहेको थियो।

बडादसैँको अवसरमा आयोजित कार्यक्रममा सहभागीहरूले एकअर्कालाई टीका लगाएर शुभकामना आदानप्रदान गरेका थिए। कार्यक्रममा सुख, शान्ति, समृद्धि, सुस्वास्थ्य, दीर्घायु तथा उत्तरोत्तर प्रगतिको कामना गरिएको थियो।

बडादसैँ नेपाली समाजको प्रमुख धार्मिक तथा सांस्कृतिक पर्व हो। यस पर्वले असत्यमाथि सत्यको विजय, अन्यायमाथि न्यायको विजय तथा सामाजिक सद्भाव, एकता र मेलमिलापको सन्देश दिने विश्वास गरिन्छ। चाडपर्वका अवसरमा आयोजना गरिने यस्ता कार्यक्रमले धार्मिक तथा सांस्कृतिक परम्पराको संरक्षणसँगै आपसी सम्बन्ध सुदृढ बनाउन सहयोग पुग्ने अपेक्षा गरिएको छ।
कार्यक्रमको सञ्चालन शिक्षक लक्ष्मण यादवले गर्नुभएको थियो।